Оҳангаронда чамадон ичидан аёл кишининг мурдаси топилди

Марҳумнинг шахси аниқланиб, қасддан одам ўлдириш моддаси билан жиноят иши қўзғатилган.

27 январ куни соат 21:30ларда Оҳангарон тумани “Гулобод” маҳалласидан Паркент тумани “Қизилтоғ” қўрғонига олиб борувчи йўлнинг чап тарафи йўл сатҳидан 3 метр пастликда, қизил рангли чамадон ичидан ёши тахминан 30–35 ларда бўлган, осиё миллатига мансуб аёл киши мурдаси қотиллик аломатлари билан топилган.

Бу ҳақда хабар қилган Тошкент вилояти прокуратураси ҳолат юзасидан шу куннинг ўзида Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатган.

Айни дамда мурданинг шахси аниқланган. Дастлабки терговни вилоят прокуратураси олиб бормоқда.