Украинада миллий гвардия зобити беш кишини отиб ўлдирди. Уни «қулоқ» деб ҳақорат қилишган

Фожиа 27 январ куни Днепрдаги миллий гвардия зобитлари қўриқлайдиган «Южмаш» заводи ҳудудида, соат 04:00лар атрофида содир бўлган. Зобитларга қурол беришаётганда муддатли ҳарбий хизматчи Артемий Рябчук кутилмаганда бошқа зобитларни отиб ташлайди. Видеода у отиб ташлаган қурбонлари ўлганини текшириш учун яна ортга қайтгани кўринган.

Рябчук миллий гвардия зобитларидан тўрт нафари ва завод ишчиси бўлган бир аёлни отиб ташлаган. Яна беш киши жароҳатланган. Хусусан, миллий гвардиянинг 22 ёшли аёл зобитига уч марта ўқ узилган. Қиз елкасидан, тиззасидан ва қорнидан ўқ еган, уч литрдан ортиқ қон йўқотган, аҳволи оғир.

21 ёшли Артемий Рябчук Одесса областидаги Измаил шаҳрида туғилган. Муддатли ҳарбий хизматчи бўлган, отасиз ўсган. «Украина 24» телеканали маълумотига кўра, Одессадаги корхоналардан бирининг омборида ишлаган. Ўтган йил кузида хизматга чақирилган.

Қотиллик содир этилганидан бироз ўтиб тезкор тадбир ўтказган полиция ходимлари Рябчукни тергов қилгани тасвирланган видео тарқалди. Видеода зобитдан завод ишчиси бўлган аёлни ва аёл зобитни нега отганини сўрашган. «Оператор ҳар 30 дақиқада ҳарбий қисм билан боғланиб, вазият ҳақида маълумот беришини билардим. Уни (аёл зобитни) ҳисоб бермаслиги учун отиб ташладим», деган Рябчук.

Завод ишчиси бўлган аёл чиқиш эшиги олдида зобитнинг йўлини тўсган. У эшикни очмаган ва калитни ҳам бермаган. Шундан кейин зобит унинг бошига ўқ узган. Аммо барибир эшикни оча олмай, тиканли симнинг бир бурчагини кесиб, девор ошиб чиқиб кетган.

Зобитнинг устидан кулишган

Артемий Рябчук нега шерикларини отиб ташлагани аниқ эмас, аммо Украина парламентидаги инсон ҳуқуқларини ҳимоя қилиш қўмитаси аъзоси Юлия Яцик фейсбукдаги саҳифасида ёзишича, йигитни шериклари ҳақорат қилган.

«Икки ой аввал Рябчук аскарлар ўртасидаги жанжални тинчитган. Кейин раҳбариятга бу ҳақда хабар берган. Аммо раҳбарият ҳеч қандай чора кўрмаган, йигитни «қулоқ» деб атаб, устидан кулишган. У атай икки ой қурол олиш муддати етишини кутган ва қасд олишни кутиб юрган. Қилган ишидан афсусланмайди», деб ёзган Яцик.

Депутатнинг айтишича, қасос олиш истаги Рябчукни оқлаш учун асос бўла олмайди, лекин бу мотив бошқа ҳарбийларни жавобгарликка тортмаслик учун хизмат қилиши мумкин.

Рябчук ҳақида Украина нашрларида турли маълумотлар тарқатишди. Маълум бўлишича, йигитнинг отаси уч йил аввал вафот этган. Онаси яқинда кўзи ёриган қизининг олдига, Россияга кетган. У ўсган уйда ҳозир ҳеч ким яшамайди. У муқобил хизматни танлаши мумкин бўлган, лекин миллий гвардияда хизмат қилишни истаган. Рябчук туғилиб ўсган Броска қишлоғида яшовчилар Артемий бу ишни қилиши мумкинлигига ишонмай, у яхши йигит бўлганини айтишган.

Украина Давлат суриштирув бюроси барча ҳолатларни, хусусан, Рябчук тазйиқ ёки босимга учраган-учрамаганини текширишини маълум қилди. Бюронинг хабар беришича, Рябчук полицияга ўзи таслим бўлган. У йўловчи аёлдан полицияга қўнғироқ қилиб, ўзи турган жой ҳақида маълумот беришни сўраган.

Зобит аввало руҳий экспертизадан ўтказилади. Шунингдек, жиноятни содир этган вақтда алкогол ичимлик ёки наркотик модда таъсирида бўлган-бўлмагани аниқлаштирилади.

Украина миллий гвардияси қўмондони ишдан кетди

Украина миллий гвардияси қўмондони, генерал-полковник Николай Балан воқеа содир бўлган 27 январнинг ўзида ишдан кетиш бўйича ариза ёзган.

«Ҳар қандай яхши ёки ёмон ҳаракат учун қўмондон жавобгарликни гарданига олиши керак. Бугун эрталаб ички ишлар вазирига рапорт, президентга ишдан кетиш бўйича ариза ёздим», деган генерал матбуот анжуманида.

Николай Балан истеъфога чиққунига қадар Рябчук хизмат қилган полкдаги барча командирларни ишдан бўшатганини айтди. Полк командири, унинг шахсий таркиб билан ишлаш бўйича ўринбосари, штаб бошлиғи ишдан кетган. Кечга бориб Украина президенти Владимир Зеленский миллий гвардия қўмондонининг аризасини қабул қилиб, уни лавозимдан озод этди.