Британия бош вазири Борис Жонсон Киевга борди. Қироллик ҳукумати расмий сайтида ёзилишича, Жонсон Россия агрессияси фонида Украина билан бирга эканини кўрсатиш учун Киевга борган.
Жонсоннинг Киевга ташрифи давомида хавфсизлик масаласида Владимир Зеленский билан учрашув ўтказилади. Хусусан, Британия Украинага 118 миллион доллар миқдорида ҳарбий ёрдам кўрсатиши эълон қилиниши кутилмоқда.
Борис Жонсонни кутиб олган Украина президенти Владимир Зеленский у билан таржимонсиз гурунг қилишга улгурди. Жонсоннинг ёрдамчиси югуриб келиб унинг қўлидан ҳужжатлар папкасини «юлқиб олгани» эса ОАВнинг диққати ва камерасига тушди.
Жонсон Зеленскийга Британия улар билан бирга эканини айтиш асносида бардам бўлишни сўради ва Украина президентини енгил муштлаб қўйди. Зеленский билан учрашувдан кейин Жонсон Россия президенти Владимир Путин билан телефонда гаплашиши кутилмоқда. Кеча бўлиб ўтиши режалаштирилган мулоқот қолдирилганди. Жонсон Путин билан эртага гаплашиши ҳам мумкин.
Жонсон билан бирга Киевга Британия ташқи ишлар вазири Лиз Трасс ҳам учиши керак эди, аммо унда коронавирус аниқланиб, Украинага боролмади. Шу сабаб Украина, Британия ва Польша ўртасида кичик хавфсизлик альянси тузилганини эълон қилиш бир муддат кечиктирилди. Учрашувлардан кейин Борис Жонсон журналистлар учун брифинг ўтказади.
Британия бош вазири Украинага бориш учун Японияга сафарини бекор қилди. Жонсон келишидан аввал Твиттерда «Киевга учяпман. Бошқа демократик мамлакатлар каби Британия ҳам Украина суверенитетини уни бузиш ниятидагилар олдида қўллаб-қувватлашга тайёр» деб ёзганди.
Жонсоннинг Киевга келиши Россия ва Украина ўртасида юзага келган таранглик фонида Киев учун жиддий қўллаб-қувватлов бўлиши айтилмоқда. Экспертларнинг фикрича, Россия билан муносабатлари совуқ бўлган Британия бош вазирининг Киевга ташрифи орқали Украинани қанчалик жиддий қўллашга тайёрлигини кўрсатмоқчи.
