Ишга маст ҳолда келган 2 нафар метро ходими ишдан бўшатилди

Қайд этилишича, жорий йилнинг 30 январь куни Тошкент метрополитенининг Сергели-1 бекатида тунги навбатчиликни қабул қилиш вақтида бекат навбатчиси М.М. ва фаррош М.С. иш жойига спиртли ичимлик истеъмол қилган ҳолда келган. 

Вазиятга аниқлик киритилишича, бекат навбатчиси М.М. ҳамда катта оператор Г.И. фаррош М.С.нинг туғилган кунини нишонлаш мақсадида иш вақтидан аввал кафега борган ва ходимлар М.М. ҳамда М.С. спиртли ичимлик истеъмол қилган. Тиббий экспертиза хулосасига кўра, бу ҳолат ўз тасдиғини топди. 

Ўз хатти-ҳаракати билан меҳнат интизомини қўпол равишда бузгани учун Ҳаракат хизмати 1-бекат навбатчиси М.М. ва бекат фарроши М.С. билан тузилган меҳнат шартномалари Меҳнат кодекси 100-моддаси иккинчи қисми 4-банди ҳамда Тошкент метрополитени ички меҳнат тартиби қоидалари 1-иловаси 2-бандига (иш жойида ёки ишга маст ҳолда, гиёҳвандлик, психотроп воситаларини истеъмол қилиб келиш, бу гувоҳлар кўрсатмаси ёки тиббий хулоса тасдиқланган бўлса) асосан бекор қилинган.

Ҳаракат хизмати 1-бекат катта оператори Г.И. эса М.М. ва М.С. спиртли ичимлик истеъмол қилиб иш жойига келгани, бу ҳолат метрополитенда ҳаракат хавфсизлигига рахна солиши ва фожиа билан тугаши мумкинлигини била туриб раҳбариятга маълум қилмагани учун унга нисбатан Меҳнат кодекси 181-моддаси биринчи қисми 1-бандига асосан ҳайфсан интизомий жазоси қўлланган.