Иқлим ўзгариши сабаб дунё иқтисодиёти кейинги 30 йилда 8 триллион доллар йўқотиши мумкин

БМТга кўра, охирги 20 йилда дунё бўйича табиий ҳалокатлар сабаб 1,2 миллион одам ҳалок бўлган, иқтисодиётга 3 миллиард доллар зарар етган.

Фото: Getty Images

Жаҳон метеорология ташкилоти маълумотига кўра, охирги 20 йилда табиий офатлар интенсивлиги дунё миқёсида 5 баробарга ошган. Бу ҳақда Ўзгидромет бош директор ўринбосари Ибратжон Каримов маълумот берди.

Унга кўра, 1971 йилдан бери то ҳозиргача 11 мингдан ортиқ иқлим ўзгаришлари билан боғлиқ йирик табиат ҳалокатлари содир бўлган. Кейинги 30 йилга қилинаётган башоратларга қараганда, дунё иқтисодиёти иқлим ўзгариши натижасида 8 триллион доллар маблағ йўқотиши ёки ЯИМ 3 фоизгача пасайиши мумкин.

Ибратжон Каримов иқлим ўзгаришларининг Ўзбекистондаги салбий таъсири миқёсига ҳам тўхталди.

“Орол денгизининг ҳалокатли қуришидан кейин, Орол ҳудудидаги 5 млн 300 минг гектар майдонда Оролқум пайдо бўлди. Натижада атмосферага ҳар йили 100 млн тонна тузли чанглар кўтариляпти. Улар Антарктидадан ҳам, космосдан ҳам топилмоқда. Бундан ташқари, дунёдаги исиш жараёнлари Ўзбекистоннинг шимолий ҳудудлари бўлмиш Қорақалпоғистон ва Хоразмда ҳам исишни 2 баробар тезлаштирган”, – деди Каримов.

Тайёрлаган: Зуҳра Абдуҳалимова

#иқтисодиёт #иқлим ўзгариши