Сурхондарёда пора эвазига фуқаронинг дипломини нострификация қилиб бермоқчи бўлган шахс ушланди

Бош прокуратура ҳузуридаги департаментнинг хабар беришича, департамент ҳамда ДХХ Узун тумани бўлимлари томонидан тезкор тадбир ўтказилган. Тадбирда, фуқаро А.Н. бошқа бир фуқаро М.нинг ишончига кириб, унинг Тожикистондаги Педагогика университетини тугатганлиги ҳақидаги дипломини гўёки “С.” исмли таниши орқали нострификация қилиб беришни ваъда қилиб, эвазига 1 100 доллар ва 6,5 миллион сўм олган вақтида ашёвий далиллар билан ушланган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.