Навоийда тадбиркорнинг катта миқдордаги пулини қўлга киритмоқчи бўлган шахслар ушланди

Улар 2 га ерни расмийлаштириб бериш эвазига тадбиркордан 140 минг АҚШ доллари сўрашган.

Фото: Прокуратура департаменти

Бош прокуратура ҳузуридаги Иқтисодий жиноятларга қарши курашиш департаментининг хабар беришича, Д.Н. ва С.Я. “Н.Ф.” МЧЖ раҳбари Н.нинг ишончига кириб, кўп қаватли турар жой қуриш учун бошқа бир МЧЖга ажратилган 2 га ер майдонини “Н.Ф.” МЧЖ номига расмийлаштириб бериш эвазига 140 000 АҚШ доллари талаб қилишган. Фирибгарлар келишилган пулдан 10 000 АҚШ долларини олган вақтида департамент ҳамда ДХХнинг Навоий вилояти бошқармалари томонидан ўтказилган тезкор тадбирда қўлга олинган. Тезкор тадбир давом эттирилиб, уларнинг шериги О.Р. ҳам ашёвий далиллар билан ушланган.

Ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Тошкент вилоятида 4 гектар ерни 800 минг долларга пулламоқчи бўлганлар қўлга тушди