Финландия Россия билан поезд қатновини тўхтатади

Европа ишлари ва мулкни бошқариш вазири Тютти Туппурайнен бундан буён Allegro поездидан фойдаланиш «мақсадга мувофиқ эмас»лигини билдирган.

Фото: Reuters

Финландия 28 мартдан бошлаб Хелсинки ва Санкт-Петербург ўртасида қатновчи Allegro тезюрар поездлари қатновини тўхтатади. Бу ҳақда Финландиянинг VR Group темирйўл концерни вакиллари маълум қилди.

«Россиядан кетишни истаганлар учун охирги бир неча ҳафта давомида етарлича вақт бўлди. Энди санкциялар фонида хизмат кўрсатишни вақтинча тўхтатамиз», — деди VR Group катта вице-президенти Топи Симола.

Маълумот берилишича, 27 март куни Хелсинкидан Санкт-Петербургга эрталабки поезд йўл олади, кундузги рейс эса бекор қилинади. Якшанба куни Санкт-Петербургдан жўнайдиган поезд жадвал бўйича ҳаракатланади.

Helsingin Sanomat нашрининг ёзишича, Финландиянинг Европа ишлари ва мулкни бошқариш вазири Тютти Туппурайнен VR Group концернига йўллаган мактубида бундан буён Allegro поездидан фойдаланиш «мақсадга мувофиқ эмас»лигини билдирган.

Унинг қайд этишича, РЖД компанияси ЕИ санкциялар рўйхатига киритилган.