«Арсенал» ва «Челси» шоу уюштирди, Бензема иккита пенальтини уролмади. Кун ўйинлари якунлари

Англия: «Сити» яна «Ливерпуль»дан ўзиб кетди

Челси — Арсенал 2:4
Голлар: Вернер (17), Аспиликуэта (32) — Нкетиа (13, 57), Смит-Роу (57), Сака (90+2, пенальти).
Челси – Менди, Аспиликуэта, Кристенсен (Силва, 46), Сарр, Жеймс, Алонсо (Зиёш, 81), Канте, Лофтус-Чик, Маунт, Лукаку (Ҳавертц, 60), Вернер. 
Арсенал – Рэмсдейл, Уайт, Ҳолдинг, Габриэл, Нуну Тавареш, Жака, Эль-Ненни, Эдегор, Смит-Роу (Соареш, 75), Нкетиа (Мартинелли, 70), Сака (Ляказетт, 90+5).
Огоҳлантиришлар: Сарр (65), Маунт (85), Габриэл (90+1), Аспиликуэта (90+1).

Сўнгги беш турда тўрт бор мағлубиятга учраган «Арсенал» учун қийин дамлар келди. Улардан янгича қарорлар талаб этиларди ва Микел Артета «канонирлар»нинг бошланғич таркибини шундай туздики, 20 йилдан ошиқ вақт мобайнида жамоада илк бор 6 нафар англиялик футболчи ўйинни майдонда бошлади. Бу иш берди, меҳмонлар енгил ҳаракат қилишди, қизиқарли комбинациялар уюштиришди, голларни ҳам инглиз футболчилар уришди.

Биринчи бўлимдаги муаммолар ташаббусни сақлаб қола олмаслик билан боғлиқ эди, шу туфайли «Челси»нинг жавоб голлари жуда оддий ҳолатларда урилди. Биринчи сафар Рамсдэйл қутқара олмади, бу ҳолатда кичик рикошет Вернернинг узоқ масофадан йўллаган зарбаси голга айланишига сабаб бўлди. Кейинги голда ҳимоячилар фол учун ўйин тўхтатилишини кутиб, марказий форвард позициясида пайдо бўлган Аспиликуэтани қўриқлай олишмади.

Аммо ўйиннинг иккинчи қисмида «Арсенал» тартиблироқ ўйнади, кўкларга эса футболчи алмаштиришлар фойда бермади, биринчи гол ўтказилиши вақтида тўпни Нкетиага топшириб қўйган Кристенсен ўрнини Тиагу Силва эгаллаганди. Бразилиялик ҳимоячи 37 ёш-у 210 кунлигида «Челси» учун АПЛда ўйин ўтказган энг ёши катта футболчига айланди. Аммо айнан мезбонлар ҳимоячиларининг қўпол хатолари сериясидан кейин Нкетиа дублни расмийлаштирди. Қўшимча дақиқаларда эса Аспиликуэта пенальтига сабабчи бўлди ва Сака ўзи ишлаган жарима зарбасини аниқ амалга ошириб, принципиал рақибни «кўмди». Бу муваффақият «канонирлар» учун тўртинчи ўрин учун курашда муҳим аҳамиятга эга бўлади, энди улар «Тоттенҳэм» билан очколар сони бўйича тенглашиб олди.

Манчестер Сити — Брайтон 3:0
Голлар: Маҳрез (53), Фоден (65), Силва (82).
Манчестер Сити – Эдерсон, Канселу, Стоунз (Зинченко, 77), Лапорт, Аке (Диаш, 46), Гундўған, де Брюйне (Жезус, 83), Родри, Силва, Фоден, Марез. 
Брайтон – Санчес, Лэмпти (Уэбстер, 61), Данк, Велтман, Кукурелья, Марч, Мак Аллистер, Мвепу, Кайседо, Гросс, Уэлбек (Мопе, 78).
Огоҳлантиришлар: Мак Аллистер (79), Уэбстер (81), Данк (89).

Яқинда қаторасига икки сафар ўйинида «Арсенал» ва «Тоттенҳэм»ни мағлуб этиб, Шимолий Лондонни забт этган «Брайтон» «Сити»га қарши фақат бир бўлим туриб бера олди. Қоидасига кўра, бундай ўйинларда фаворит учун биринчи голни уриш муҳим ва уни биринчи бўлим давомида фаол ўйини билан ажралиб турган футболчи урди. Биринчи бўлимда дарвозабон бўш қолдирган дарвозани ишғол этиш имконини бой берган Маҳрез Кевин Де Брюйненинг юришини гол билан якунлади. Кўп ўтмай рикошет Фоденнинг узоқ масофадан йўллаган зарбасидан кейин меҳмонларга имкон қолдирмади, ўйин охирида Де Брюйне бошлаб берган яна бир ҳужумни Бернарду Силва аниқ зарба билан якунлади ва жамоа биринчи ўринга қайтди.

«Ливерпул» билан пойга Хосеп Гвардиола сценарийси бўйича давом этмоқда. Ушбу мураббий 344 ўйинда 250 ғалабага эришди ва АПЛ рекордини ўрнатди. Бу ақл бовар қилмас рақамлар, бу борадаги иккинчи ўринда жойлашган Жозе Моуриньо бунча ғалаба учун 396 ўйин ўтказишига тўғри келган.

Испания: Симеоне яна бир ўғлини майдонга чиқарди

Атлетико — Гранада 0:0
Атлетико — Облак, Льоренте (Симеоне, 90+1), Савич, Эрмосо, Мандава (Суарес, 46), Коке, Серрано (Врсалько, 46), Карраско, де Пауль, Корреа (Лоди, 66), Гризманн (Кунья, 70).
Гранада — Максимиану, Куини, Диас, Дуарте, Эскудеро, Милья, Петрович, Пуэртас (Раба, 86), Кольядо (Монторо, 76), Мачис (Узуни, 62), Суарес (Бакка, 76).
Огоҳлантиришлар: Куини (3), Мандава (29), Савич (45+4), Эскудеро (58), Диас (74), де Пауль (78), Пуэртас (83), Врсалько (85), Дуарте (90+2).

Бир неча кун муқаддам «Атлетико» «Эспаньол» билан ўйинда мухлисларини инфаркт ҳолатига туширган (бир киши кам бўлиб қолган ҳолатда қўшиб берилган 10-дақиқада ғалаба голи урилган), аммо турнир жадвалининг қуйи қисмидаги «Гранада»га қарши ўйин жуда зерикарли кечди. Мадридликлар бу ўйиннинг сўнгги дақиқаларида ғалабани илиб кетишга ҳаракат қилишди, Феррейра-Карраско Матеус Куньени ажойиб пас билан таъминлади, аммо бразилиялик футболчининг зарбаси дарвоза тўсинига тегди. Бешинчи ўринда келаётган ва бу турда очко йўқотган «Бетис»дан илгарилаб кетиш имкониятидан фойдаланилмади, бу ўйиндаги ёдда қоларли воқеа эса Диего Симеоне қўшимча дақиқаларда ўзининг 19 ёшли ўғли Жулианони майдонга чиқариши бўлди. Қолаверса, «Гранада» 1974 йилдан буён илк бор «Атлетико» майдонидан очко олиб қайтгани билан фахрланиши мумкин.

Осасуна — Реал 1:3
Голлар: Будимир (13) — Алаба (12), Асенсио (45), Васкес (90+6).
Фойдаланилмаган пенальтилар: Бензема (52, 59). 
Осасуна — Эррера, Видаль, Д.Гарсия, Эрнандес, Коте (Барха, 68), Манкайола, Авилья (Барберо, 86), Мартинес (Ойер, 68), Брашанац (Торрес, 80), Р.Гарсия (Санчес, 46), Будимир. 
Реал — Куртуа, Начо, Алаба (Карвахаль, 46), Милитао, Васкес, Камавинга (Иско, 73), Вальверде, Себальос (Кроос, 73), Родриго (Винисиус, 90), Асенсио, Бензема.
Огоҳлантиришлар: Камавинга (5), Брашанац (44), Милитао (60), Начо (62).

Карло Анчелотти Европадаги кучли бешлик чемпионатларининг барчасида чемпионликка эришган илк мураббий сифатида тарихга кириши учун икки ўйин қолди. «Реал»нинг Памплонадаги ғалабаси эса Бензема икки марта 11-метрдан гол ура олмагани билан ёдда қолди. Бу мавсумга қадар французда пенальтидан гол уришда умуман муаммо бўлмаганди. Мавсум давомида аввалига биринчи хато рўй берди, энди эса — иккиталик хато. Бундай ҳолат ла лигада 2006 йил апрелидан буён кузатилмаганди, «Эспаньол» ҳужумчиси Рауль Тамудо «Бетис» (2:0) билан баҳсда шундай муваффақиятсизликка учраган. «Реал» футболчиси бир ўйинда икки пенальтини йўққа чиқариши эса охирги бор 2003 йилда рўй берган. Лекин бу қаймоқранглиларга чемпионлик учун яна бир қадам ташлашга халал бера олмади. Мадрид клуби чемпион бўлиш учун қолган 5та турда камида 4 очко тўплаши етарли бўлади.

Германия: иродали «Лейпциг»

Лейпциг — Унион Берлин 2:1
Голлар: Силва (61, пенальти), Форсберг (90+3) — Бекер (25).

«Лейпциг» яримфиналга 14 учрашувдан иборат мағлубиятсиз серия билан етиб келди, аммо берлинликлар ҳисобни очиши яна бир бор кубок турнирларининг ўз қонунлари борлигини ёдга солиб қўйди. Бундай турнирларда барчаси «ҳозир ва шу ерда» ҳал қилинади, хато қилишга эса ҳаққинг бўлмайди. Шу туфайли Андре Силва жуда чиройли комбинациядан кейин 11-метрлик нуқта ҳудудидан ҳеч қандай қаршиликсиз ҳолатда хато зарба йўллагани жамоа учун жуда қимматга тушиши мумкин эди.

Аммо португалиялик ҳужумчи иккинчи бўлимда хатосини тузатди ва Нкунку томонидан ишланган, Феликс Бриҳ видеотакрорни кўриб чиққанидан кейин белгиланган пенальтини аниқ ижро этди. «Унион» бир қанча мураккаб вазиятлардан омон чиқди ва ўйин овертаймларга қараб кетаётганди, мезбонлар эса қўшимча дақиқаларда Форсбергнинг бош билан «тўққизлик»ни аниқ нишонга олиши орқали ғалабани илиб кетди.

Бу «Лейпциг» учун сўнгги тўрт йилда учинчи финал. Аввалги икки уриниш «Бавария» ва Дортмунднинг «Боруссия»сига мағлуб бўлиш билан якунланган. Ҳозир эса бу икки гранд турнирни тарк этиб бўлган, Тедеско совринни қўлга киритиши учун «Фрайбург»ни енгиши талаб этилади.

Италия: Влаҳович «Фиорентина»ни ранжитмади

Ювентус — Фиорентина 2:0
Голлар: Бернардески (32), Данило (90+4).
Биринчи ўйин — 1:0.

Бу мавсумда «Ювентус» ва «Фиорентина» жамоалари қарама-қаршилигига А Сериянинг энг яхши тўпурарининг туринликлар клубига ўтиши призмаси орқали қаралди. Аммо серб ҳужумчиси Флоренцияда ҳам, жавоб ўйинида ҳам гол урмади. Ўйиндаги натижани Бернардески ва қўшимча дақиқаларда дарвозани ишғол этган Данилу таъминлашди. Италия Кубоги финалига қаторасига учинчи бор чиққан «Кекса синьора» энди титул учун «Интер» билан тўқнашади. «Дерби Италия» Массимилиано Аллегри ва Симоне Индзагининг мураббийлик дуэли нуқтайи назаридан ҳам аҳамият касб этади. Ҳозирча бу қарама-қаршиликда иккинчисининг қўли баланд келмоқда, миланликлар «Юве»ни Италия Суперкубогида мағлуб этишган ва чемпионатдаги ўзаро ўйинларда 4 очкони қўлга киритишган.

Франция: «Марсель» парижликларнинг байрамини кечиктирди

Анже — ПСЖ 0:3
Голлар: Мбаппе (28), Рамос (45+1), Маркиньос (77).
Четлатиш: Мишю (90+1).

Марсель — Нант 3:2
Голлар: Пайет (39 пенальти, 54 пенальти), Ҳарит (75) — Жиротто (26), Коко (41). 
Четлатиш: Коко (90+3).

Танаффусдан кейин «ПСЖ»ни чемпионлик титулини нишонлашдан бир бўлим ажратиб турарди. Парижликларда Мбаппе узоқ масофадан гол уриб (мавсумдаги 33-голи) ўз вазифасини бажарди. Бу вақтда Маурисио Почеттино жамоасига кутилмаганда «Нант» ёрдамга келди, жамоа сафар ўйинида сенсацион равишда «Марсель»ни енгаётганди. Аммо иккинчи бўлимда «канарейкалар»га куч етишмади ва Хорхе Сампаоли шогирдлари камбэк амалга оширишди (3:2).

Энди чемпионат ғолиби масаласи кейинги тургача қолдирилди. Бу турда эса навбатдаги жароҳатдан тузалиб сафга қайтган Серхио Рамос Франциядаги илк голини урди, Ди Мария икки голли узатмани амалга оширди. «ПСЖ» томонидан ҳамон янги шартнома таклиф этилмаётган аргентиналик футболчи Париж клубидаги фаолияти давомида 200 балл ишлаб бўлди — 90 гол ва 110 ассист.

Кун статистикаси

• Франция чемпионатида «Реймс» 4 ўйинда ҳал қилувчи голни 90-дақиқадан кейин урган ҳолда ғалабани илиб кетган, бу борада жамоа «ПСЖ»ни ортда қолдирди.
• «Лестер» аввалги тур билан таққослаганда бошланғич таркибда 7 футболчини ўзгартирди. Бу АПЛнинг жорий мавсумида энг жиддий таркиб ўзгариши.
• 20 гол урган Террье — «Ренн»нинг жорий асрда лига 1 даги энг яхши тўпурарига айланди.
• «Челси» сафида яримҳимоячи Маунт 100-ўйинини ўтказди.
• Митрович Чемпионшипнинг 40 ўйинида 40 гол урди, у «Фулҳэм»билан яна АПЛга қайтди.