Талабалар ўртасида интеллектуал олимпиада ташкил этилади. Ғолиблар кадрлар захирасига киритилади

Вазирлар Маҳкамасининг “Олий таълим муассасалари талабалари ўртасида интеллектуал олимпиадани ташкил қилиш чора-тадбирлари тўғрисида”ги қарори лойиҳаси эълон қилинди.

Қуйидагилар:

• олий таълим муассасалари ўртасида интеллектуал олимпиадага тайёргарлик кўриш ва уни ўтказиш бўйича ташкилий қўмита таркиби;
• олий таълим муассасалари талабалари ўртасида интеллектуал олимпиадани ўтказиш тартиби тўғрисидаги низом тасдиқланади.

Ташкилий қўмита:

• интеллектуал олимпиадага таълим йўналиши, соҳаси, мутахассислигидан қатъи назар, республикадаги барча олий таълим муассасалари талабаларини жалб этиш чораларини кўради;
• умумжамоа ҳисобида биринчи, иккинчи ва учинчи ўринни эгаллаган олий таълим муассасаларини рағбатлантириш, шу жумладан Ўзбекистон президенти совғаси топширилишини таъминлайди;
• интеллектуал олимпиаданинг ғолиб ва совриндорларини ўз мутахассислиги бўйича кадрлар захирасига киритиш учун Давлат хизматини ривожлантириш агентлигига тақдим этиб боради;

Белгиланишича, интеллектуал олимпиадани ўтказиш билан боғлиқ:

• жамоаларнинг яшаш ва транспорт харажатлари ушбу жамоа аъзолари таълим олаётган олий таълим муассасаларининг бюджетдан ташқари жамғармалари маблағлари ҳисобидан;
• ғолиб ва совриндор бўлган жамоаларни рағбатлантириш харажатлари Ўзбекистон президентининг “Заковат” интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида”ги қарорига асосан Ёшлар ишлари агентлиги орқали Давлат бюджетидан “Заковат” интеллектуал клуби” нодавлат нотижорат ташкилотига ажратиладиган маблағлар ҳисобидан қопланади.