Киев россиялик ҳарбий асирларни «Азовстал»ни тарк этган аскарларга алиштиришга тайёр - Зеленский

Зеленскийнинг сўзларига кўра, «Азовстал» комбинатидан олиб чиқилган тинч аҳоли ва аскарларни қутқариш бўйича ҳамкор мамлакатлар билан музокаралар давом этмоқда.

Фото: Anadolu Agency

Украина «Азовстал» комбинатидан олиб чиқилган украиналик аскарларни россиялик ҳарбий асирларга алиштиришга тайёр. Бу ҳақда Украина президенти Володимир Зеленский айтди.

Унинг сўзларига кўра, «Азовстал» комбинатидан олиб чиқилган тинч аҳоли ва аскарларни қутқариш бўйича ҳамкор мамлакатлар билан музокаралар давом этмоқда. Мазкур ташаббус доирасида Туркия, Швейцария, Исроил ва Франция раҳбарлари билан мулоқотлар ўтказилди, деди Зеленский.

Зеленскийнинг эслатишича, «Азовстал»даги аскарлар олиб чиқилганидан сўнг Киев уларни россиялик ҳарбий асирларга алиштиришни кутган ва бунга тайёр.

«Биз уларни уйга қайтарамиз», -деди Зеленский.

Шу билан бирга, Украина президенти Киев низо тугаши учун барча саъй-ҳаракатларни амалга оширишини таъкидлади.

«Уруш – қийин, ғалаба ҳам жуда қийин бўлади, у қонли бўлади, аммо якуни дипломатияга боғлиқ», - деди Зеленский.