Мотивацион постерлар ва бўш кўчалар. Шимолий Корея коронавирусга қарши қандай курашяпти?

Шимолий Корея коронавирус аниқланганини расман тан олгач, мамлакатда фавқулодда вазият эълон қилинган. Бу вазиятда ёпиқ мамлакатда озиқ-овқат ва дори-дармон танқислиги кузатилиши эҳтимоллари ҳақида тахмин қилинди, бироқ аниқ маълумотлар етарли эмас. Суратлар эса КХДР ҳозир бутунлай локдаунга кирганини, кўчаларга мотивацион баннерлар илинганини кўрсатади.

12 май куни Шимолий Корея ҳукумати Пхеньянда коронавируснинг “омикрон” вариантига чалиниш билан боғлиқ илк ҳолатлар аниқланганини хабар қилди – коронавирус 8 май куни тест топширган одамларда аниқланган.

Шундан кейин бутун мамлакатда “максимал фавқулодда ҳолат” жорий этилиб, локдаун эълон қилинди. Бундан ташқари, мамлакатда апрел ойидан бошлаб номаълум безгак ҳам тарқалган.

Reuters агентлиги Шимолий Кореяда коронавирус билан кураш қандай кечаётгани ҳақида фотосуратларни жамлади. Суратларда Шимолий Корея кўчалари бўм-бўш экани, пандемияга қарши кураш тасвирлари акс этганини кўриш мумкин.

Плакатда Шимолий Корея дезинфекция ишчиси тасвирланган. Фото: REUTERS

Суратда армия ходими ва махсус ҳимоя воситаси кийган шахс тасвирланган. Шимолий Корея бу ҳафта коронавирусни жиловлаб туриш ва тартибни сақлашда муваффақиятга эришилаётганини маълум қилган.
Фото: REUTERS

Коронавирусга оид тиббий анжомларни ташиётган ходимлар тасвири туширилган баннер илинган кўча. Кўча бўм-бўш
Фото: REUTERS

Мамлакатнинг анча пайтдан буён ёпиқлиги, озиқ-овқат ва тиббий буюмлар танқислиги сабаб 25 млн аҳолининг ҳаёти хавф остида қолиши мумкинлиги, бундай вазиятда Шимолий Корея дунёга очилиши мумкинлиги проноз қилина бошланди.

Шимолий Корея етакчиси Ким Чен Ин армиянинг ҳарбий-тиббий хизматини дорихоналарни зарур дори-дармонлар билан узлуксиз таъминлашга жалб қилишни буюрган.