Сербия Евроиттифоқ санкциялари туфайли Россия нефтидан маҳрум бўлади

Сербия жорий йилнинг 1 ноябридан бошлаб Европа иттифоқи эмбаргоси туфайли Россия нефтидан маҳрум бўлади. Бу ҳақда 14 июнь, сешанба куни президент Александр Вучич маълум қилди. 

«Мамлакат қаттиқ қишга ҳозирлик кўрмоқда, бироқ ҳар куни ўнлаб янги муаммолар пайдо бўлса-да, зарур бўлган ҳамма нарсани таъминлаш керак, хусусан, шуни ёдда тутиш керакки, ноябрдан бошлаб биз Россия нефтини бошқа ололмаймиз», — дея Вучич сўзларидан иқтибос келтирган Сербиянинг РТС телерадиоканали.

Сербия президентининг сўзларига кўра, биргина Белград яқинидаги Обреновац жамоаси кунига 350 тонна мазут истеъмол қилади, қишда эса бу кўрсаткич етти баробар ортади. «Биз ўзимизни мазут билан таъминлашимиз керак, аммо NIS нефть компаниясида у етарли эмас, биз 20 минг тонна мазут импорт қиламиз, аммо бутун қиш учун 120 минг тонна керак бўлади», деди Вучич. У Руминиядан баржалар орқали ёнилғи импортини амалга ошириш режалаштирилганини қўшимча қилди. 

Бундан ташқари, Сербия қишда 100 минг тоннагача кўмирга муҳтож бўлади, амалда эса 80 минг тонна кўмир қазиб олинади, деди Александр Вучич. Унинг сўзларига кўра, мамлакатда газ таъминотидаги муаммолар ҳам бор. «Ҳамма квартираси иссиқ бўлишини истайди, шунда улар енгил кийимда юриши мумкин. Ҳеч ким қишда квартирада қалин кийинишни истамайди, лекин ҳеч ким биздан қандай қилиб газ захирасини тўлдиришимиз мумкинлиги, қандай қилиб суткасига 2,7 млн кубометр газ беришимиз ҳақида сўрамаяпти. Бу фақат Нови-Сад, Панчево ва Зреняниндаги газ билан ишлайдиган электр станциялари учун кетади», — деди Сербия президенти. 

Хорватия нефть қувурлари тизимининг оператори JANAF 6 май куни Европа иттифоқи санкциялари туфайли «Газпром нефть» таркибига кирувчи Сербиянинг NIS компанияси томонидан «Адрия» нефть қувури орқали нефтни ҳайдаш тўхтатилганини маълум қилди. Вучичнинг таъкидлашича, муқобил бўлиши мумкин бўлган Ироқ нефтининг бир баррели мамлакатга 31 долларга қимматга тушади. «Россия нефтига қарши санкциялар туфайли Сербия фуқаролари чўнтагидан 600 миллион доллар ўғирланди. Биз қийин аҳволдамиз», — деди у.