Тошкентда хонадонлардан бирига ўғриликка тушган жиноий гуруҳ аъзолари ушланди (видео)

2021 йилнинг 3 декабрь куни бир неча фуқаро Юнусобод туманидаги хонадонга ғайриқонуний равишда кириб, 1961 йилда туғилган хонадон эгаси оғзи ва қўлларини скоч билан боғлаб, 1 миллион сўмлик сейфни ва унинг ичида бўлган 15 000 доллар миқдоридаги пулларни олиб чиқиб кетган.

Фото: Тошкент шаҳар ИИББ

Тошкент шаҳар ИИББ хабарига кўра, жиноятчилар воқеа жойидан яшириниш учун хонадонга етиб келган жабрланувчи қизларини пичоқ билан қўрқитиб, улар миниб келган “Жентра” русумли машинани олиб қочган.

Ушбу жиноий гуруҳ қисқа вақт ичида Тошкент шаҳар ИИББ ходимлари томонидан ушланган.

Фуқаролар: 1978 йилда туғилган Т., 1986 йилда туғилган О., 1988 йилда туғилган Б., 1991 йилда туғилган М., 1991 йилда туғилган А., 1997 йилда туғилган А., 1998 йилда туғилган М., 2000 йилда туғилган Д.га Жиноят кодекси 164-моддаси ва 267-моддаси билан айб эълон қилиниб, қамоққа олиш эҳтиёт чораси қўлланган.

Ҳозирда жиноят иши ўрнатилган тартибда кўриб чиқиш учун жиноят ишлари бўйича Юнусобод тумани судига юборилган.