Ўзбекистон делегацияси Ўзбекистон ва Озарбойжон тадбиркор аёллари бизнес-форумида иштирок этди

Сенат раиси Танзила Норбоева бошчилигидаги парламент делегацияси расмий ташриф билан Озарбойжонда бўлиб турибди.

2022 йилнинг 29 июнь куни ташриф доирасида Ўзбекистон ва Озарбойжон тадбиркор аёллари биринчи бизнес-форуми бўлиб ўтди.

Форумда мамлакат иқтисодиёти деярли барча тармоқлари, хусусан, саноат, хизмат кўрсатиш, қишлоқ хўжалиги, ҳунармандчилик каби соҳаларни қамраб олган Ўзбекистон тадбиркор аёллари делегацияси иштирок этди.

Тадбирда сўзга чиққан ҳар икки мамлакат тадбиркор аёллари икки мамлакат турли соҳаларда тадбиркорликни ривожлантириш, салоҳиятини юксалтириш борасида тажриба алмашиш, долзарб муаммоларни муҳокама қилиш учун қулай майдонга айланган ушбу форум аҳамияти ва долзарблигини таъкидлади.

Тадбир сўнгида хотин-қизлар жамиятдаги ролини ошириш, гендер тенглик ва оила масалалари бўйича комиссия ҳузуридаги Тадбиркор аёллар клуби ҳамда Озарбойжонда аёллар тадбиркорлигини ривожлантириш уюшмаси ўртасида икки томонлама муносабатларни ривожлантириш бўйича ўзаро англашув меморандуми имзоланди.

Икки мамлакат тадбиркор аёллари ўртасида “B2B” форматида ўтказилган учрашувлар натижасида 54 млн доллардан ортиқ қийматда 19 та шартнома ва меморандум имзоланди.