Аввалроқ Европа халқ партияси раиси Манфред Вебер Россиядан олинадиган газни Евроиттифоқ аъзолари ўртасида тенг тақсимлашни таклиф қилганди.
Венгрия фуқароларининг пулларига сотиб олинган газдан фақат Венгрия фойдаланади, деди мамлакат ташқи ишлар вазири Петер Сийярто.
Сийярто Европарламентдаги Европа халқ партияси раиси Манфред Вебернинг газни Евроиттифоқ аъзолари ўртасида тенг тақсимлаш тўғрисидаги таклифини коммунизмга қиёслади.
«Венгрия газ омборлари Венгриянинг мулки бўлиб қолади. Венгриялик солиқ тўловчиларнинг пулларига сотиб олинган ва мамлакат газ омборларида сақланаётган газдан фақат Венгрияда фойдаланилади. Вебернинг таклифи бизга коммунизмни эслатяпти»,— деди у.
Аввалроқ Вебер ЕИнинг навбатдаги саммитида Россиядан газ етказилишини муҳокама қилиш ва газни Евроиттифоқ аъзолари ўртасида тенг тақсимлашни таклиф қилганди.
6 июл куни Петер Сийярто Венгрия яқин бир неча йил давомида Россия нефти ва газидан воз кеча олмаслигини айтди.
