Магнус Карлсен шахмат бўйича жаҳон чемпионлигини ҳимоя қилишдан воз кечди

Карлсен ўзида жаҳон чемпионлиги учун яна бир бор баҳслашишга ҳеч қандай қизиқиш йўқлигини айтди.

Магнус Карлсен / Фото: FIDE

Шахмат бўйича жаҳон чемпиони норвегиялик Магнус Карлсен ўз унвонини навбатдаги марта ҳимоя қилишдан воз кечди.

Унинг рақиби ўтган сафаргидек, даъвогарлар баҳсида ғолиб чиққан россиялик Ян Непомняшчий бўлиши керак эди. Энди жаҳон чемпиони унвони учун Непомняшчий ва даъвогарлар баҳсида иккинчи ўринни эгаллаган хитойлик Дин Лижэн курашади.

Карлсен ўзида жаҳон чемпионлиги учун яна бир бор баҳслашишга ҳеч қандай қизиқиш йўқлигини айтди. Шахматчининг сўзларига кўра, у бу қарор борасида бир ярим йил фикр қилган ва буни Халқаро шахмат федерацияси ҳамда Непомняшчий билан муҳокама қилган.

Карлсен аввал ҳам жаҳон чемпиони унвони учун навбатдаги баҳсда қатнашишдан воз кечишини айтганди. У келиб чиқиши эронлик бўлган франциялик шахматчи Алиризо Фирузжа рақиб бўлсагина баҳслашиши мумкинлигини айтганди.

Магнус Карлсен 2013 йилда жаҳон чемпионига айланган. У бу унвонни 2014, 2016, 2018 ва 2021 йилларда ҳимоя қилганди. Охирги марта унинг рақиби Ян Непомняшчий бўлганди.

Дин Лижэн россиялик Сергей Карякин Россиянинг Украинага қарши урушини қўллаб-қувватлашини билдирганидан сўнг 2022 йилдаги даъвогарлар мусобақаси қатнашчисига айланганди.