Жавоҳир Синдаров халқаро турнир саралаш босқичини биринчи ўринда якунлади

Кейптаунда бўлиб ўтаётган нуфузли турнирнинг саралаш босқичида ўзбекистонлик 20 ёшли гроссмейстер Магнус Карлсен ва Фабиано Каруана каби номдор рақибларни мағлуб этиб, 7 имкониятдан 5,5 очко жамғарди ва биринчи ўрин билан кейинги босқичга чиқди. Бугун чоракфинал баҳслари бошланади.

Жанубий Африка Республикасининг Кейптаун шаҳрида бўлиб ўтаётган Freestyle Chess Grand Slam турнири саралаш босқичининг 1-турида Жавоҳир Синдаров жаҳоннинг биринчи рақамли шахматчиси Магнус Карлсенни мағлуб этди.

Бу ўзбекистонлик 20 ёшли шахматчининг фаолиятида Магнус Карлсен устидан иккинчи ғалабага айланди.

Кейинги турларда у эронлик Парҳам Максудлу, америкалик Фабиано Каруана ва Ҳанс Моке Ниманни ҳам мағлуб этди, ҳиндистонлик Аржун Эригаиси, германиялик Винсент Каймер ҳамда америкалик Левон Аронян билан дуранг қайд этилди.

Натижада ўзбекистонлик шахматчи 5,5 очко билан саралаш турнирида биринчи ўринни эгаллади ва плей-офф босқичида (чоракфиналда) ўз рақибини биринчи бўлиб танлаш имкониятига эга бўлди. У турнир аутсайдери Парҳам Максудлуни танлади (ушбу шахматчи саралаш босқичида барча баҳсларда ютқазган).