Сенатор Эд Марки бошчилигидаги беш нафар қонун чиқарувчилардан иборат делегация Нэнси Пелосининг ташрифидан атиги 12 кун ўтиб Тайванга келди.
Америкалик қонун чиқарувчилар делегацияси Тайван оролига 14 август, якшанба куни – АҚШ Конгресси Вакиллар палатаси спикери Нэнси Пелосининг ташрифидан атиги 12 кун ўтиб етиб келди.
Сенатор Эд Марки (Массачусетс штатидан демократ) бошчилигидаги беш кишилик делегация Тайван маъмурияти раҳбари Цай Инвэн, бошқа расмийлар ва хусусий сектор вакиллари билан умумий манфаатларни, жумладан, Тайван бўғозида кескинликни юмшатиш ва яримўтказгичларга сармоя киритиш масалаларини муҳокама қилиш учун учрашади, деб хабар берди AP агентлиги.
Тайван телерадиоэшиттириш компанияси АҚШ ҳукумати самолётининг маҳаллий вақт билан соат 19:00 лар атрофида Тайпейдаги Соншан аэропортига қўнаётгани акс этган кадрларни эфирга узатди. Самолётда делегациянинг тўрт нафар аъзоси бўлган.
Эд Марки Тайваннинг Таоюан халқаро аэропортига алоҳида рейсда етиб келишидан аввал Жанубий Корея президенти Юн Сок Ёл билан учрашган эди.
Демократ АҚШ Сенатининг Шарқий Осиё ва Тинч океани билан ташқи алоқалар ҳамда халқаро киберхавфсизлик бўйича қуйи қўмитасига раислик қилади. Делегациянинг бошқа аъзолари: Амата Коулман Радеваген (Америка Самоасидан республикачи), Жон Гараменди ва Алан Лоуэнтал (Калифорния штатидан демократлар), шунингдек, Дон Бейер (Виржиния штатидан демократ). Ташриф икки кун - 14 ва 15 август кунлари давом этади.
Нэнси Пелоси 2 август куни Тайванга бир кунлик ташриф учун учиб келди. У 25 йил ичида Пекин мустақиллигини тан олмайдиган ва Хитой провинцияларидан бири деб ҳисоблайдиган оролга ташриф буюрган АҚШ Конгресси Вакиллар палатасининг биринчи спикери бўлди.
Оқ уй ва Пелосининг ўзи бу сафар АҚШнинг Тайванга нисбатан сиёсатини ўзгартиришини англатмаслигини таъкидлади. Шунга қарамай, Пекин ушбу ташрифни кескин танқид қилди ва Пелоси кетганидан кейин Хитой армияси орол ҳудудида ҳаво ва денгиз ҳарбий машқларини бошлади. Тайван Мудофаа вазирлиги Хитойнинг маневрларини ўта провокацион деб атади ва ерустида ракета тизимлари жойлаштирилишини эълон қилди.
Пекин америкалик сиёсатчи ташрифидан сўнг Тайван билан савдо-сотиқни қисман тўхтатди. Хитой ТИВ ХХР АҚШ билан қатор соҳаларда, жумладан, иқлим ўзгариши, гиёҳванд моддаларга қарши кураш, трансмиллий жиноятлар, жиноий ишлар бўйича ҳуқуқий ёрдам ва ноқонуний муҳожирларни ватанига қайтариш бўйича ҳамкорликни тўхтатаётганини маълум қилди. Хитой Пелосининг ўзига ва унинг оила аъзоларига «Хитойнинг ички ишларига аралашгани» ва «мамлакат ҳудудий яхлитлигини бузгани учун» санкциялар киритди.
