Россия суди Навалний фондига 1000 рубл жўнатган журналистга уйдан чиқишни тақиқлаб қўйди

Москванинг Басманний туман суди «Диссернет» лойиҳаси асосчиларидан бири, экстремистик фаолиятни молиялаштириш бўйича жиноий иш бўйича қўлга олинган Андрей Заякинга муайян ҳаракатларни тақиқлаш ҳақида қарор чиқарди. Бу ҳақда 29 август, душанба куни Заякин муаллифларидан бири бўлган «Новая газета. Европа» нашри хабар берди. 

Нашр хабарида таъкидланишича, журналистга, жумладан, соат 20:00 дан 8:00 гача уйдан чиқиб кетиш, иш юзасидан мулоқот қилиш, ёзишмаларни жўнатиш ва қабул қилиш, телефон ва интернетдан фойдаланиш тақиқланган. У 28 август куни тинтувдан сўнг қўлга олинди, унинг давомида Заякиндан барча электрон қурилмалар мусодара қилинди. 

8 август куни Россия Тергов қўмитаси Заякинга қарши экстремистик фаолиятни молиялаштириш (Жиноят кодекси 282-3-моддаси 1-қисми) бўйича жиноий иш қўзғатди, у Алексей Навалнийнинг Коррупцияга қарши кураш фондига (ККФ) 1000 рубл ўтказганликда айбланди. Айтилишича, Заякин бу суммани ташкилот «экстремистик» деб тан олинганидан кейин ККФ ҳисобига ўтказган. 

Журналист адвокати Михаил Бирюковнинг айтишича, «ишда гувоҳлар йўқ». У қўйилган эҳтиёт чорасини «касбни чекловчи тақиқ» деб ҳисоблади. Айбланувчи томон айбланувчининг яшириниб кетиши, ишдаги далилларни йўқ қилиши ва терговга аралашиши мумкинлиги ҳақида ҳеч қандай далил келтирмаган.