Япониянинг Mitsui компанияси «Сахалин-2»даги улушини сақлаб қолади

«Сахалин-2» оператори ўзгаришидан олдин Mitsui компаниясининг нефть ва газ лойиҳасидаги улуши 12,5 фоизни ташкил этган. Япониянинг яна бир компанияси - Mitsubishi Corp. ҳам ўз улушини сақлаб қолиш ниятида.

Фото: Global Look Press

Япон компаниясининг сайтида 31 август, чоршанба куни чоп этилган пресс-релизда айтилишича, Япониянинг Mitsui ширкати Россия томони билан «Сахалин-2» нефть-газ лойиҳасидаги ўз улушини сақлаб қолишга келишиб олди. Ҳақиқий миллийлаштириш ва лойиҳа оператори ўзгаришидан олдин Mitsui улуши 12,5 фоизни ташкил этганди.

Ушбу ҳажм сақланиб қоладими ёки йўқми, ҳозирча номаълум. Бироқ, компания Россия томони билан музокараларни давом эттиришини, шунингдек, барча манфаатдор томонлар, шу жумладан Япония ҳукумати ва бизнес ҳамкорлари билан келишувга риоя қилиш заруратидан келиб чиққан ҳолда кейинги ҳаракатларини муҳокама қилишини таъкидлаган.

26 август куни Россия ҳукумати «Сахалин-2» лойиҳасининг янги операторидаги 12,5 фоизни Дубайда рўйхатдан ўтган Mitsui шуъба корхонаси MIT SEL Investment’га ўтказишга рухсат берди. Япониянинг NHK медиакомпанияси маълумотларига кўра, лойиҳанинг Япониядан иккинчи иштирокчиси - Mitsubishi Corp. ҳам оператор ўзгаришидан олдин 10 фоизни ташкил этган «Сахалин-2»даги улушини сақлаб қолиш ниятида.

30 июнь куни Россия президенти Владимир Путин фармонни имзолади, унга кўра «Сахалин-2» оператори «Сахалин Энержи Инвестмент Компани Лтд» Россия ҳукумати томонидан яратилган янги компаниянинг мулкига айланди. Янги компанияга «Газпром Сахалин холдинг» (50 фоиз плюс 1 акция) ва корпорациянинг ўзи эгалик қилади, қолган акциялар бошқа эгаларга уларнинг улушларига мутаносиб равишда берилиши керак эди.

Эски оператор акциядорларига янги компаниянинг улушини олишга рози бўлиш-бўлмаслигини ҳал қилиш учун бир ой муддат берилди. Акциядорлар орасида «Газпром», Shell, Mitsui ва Mitsubishi Corp. бор. Шундан сўнг, 27,5 фоиз минус бир улушга эга бўлган Британия-Нидерландиянинг Shell ширкати лойиҳани тарк этишини эълон қилди. Шу билан бирга, Токио расмийлари япон компанияларидан «Сахалин-2»ни тарк этмасликни сўраган.

«Сахалин-2» лойиҳаси доирасида Россияда суюлтирилган газ ишлаб чиқарувчи биринчи завод ишга туширилди. Лойиҳа Охота денгизидаги учта бурғилаш платформасини, Сахалиндаги технологик комплексни ва орол жанубидаги терминални ўз ичига олади. «Сахалин-2» йилига 10 миллион тонна СТГ ишлаб чиқаради, олти миллион тонна Японияга жўнатилади.