Қозоғистонда тўрт кунлик иш ҳафтаси жорий этилиши мумкин

Қозоғистон Меҳнат ва аҳолини ижтимоий муҳофаза қилиш вазирлиги ижтимоий ҳимоя масалалари тўғрисидаги қонун лойиҳасини жамоатчилик муҳокамасига тақдим этди. Ҳужжат тегишли порталда эълон қилинди, деб ёзади Nur.kz.

Тушунтириш хатида айтилишича, «Қозоғистон Республикасининг айрим қонун ҳужжатларига аҳолини ижтимоий муҳофаза қилиш масалалари бўйича ўзгартиш ва қўшимчалар киритиш тўғрисида»ги қонун лойиҳаси президент мурожаатномаси доирасида ишлаб чиқилган Ижтимоий кодекс лойиҳаси қоидаларини амалга оширишга қаратилган.

«Қонун лойиҳасини ишлаб чиқишдан мақсад - Қозоғистон Республикасининг норматив-ҳуқуқий ҳужжатларини Ижтимоий кодекс қабул қилинишига мувофиқлаштириш зарурати», — дейилади эслатмада.

Қонуннинг қабул қилиниши меҳнат бозори барқарорлигини таъминлаш соҳасидаги сиёсатни такомиллаштириш, аҳоли бандлигини таъминлаш бўйича чора-тадбирларнинг шаффофлигини ошириш ҳамда ижтимоий соҳадаги кескин вазиятларга тезроқ жавоб беришга кўмаклашиши кутилмоқда.

Қонун лойиҳасининг янгиликларидан бири қозоғистонликларнинг тўрт кун ишлаш имкониятидир.

«Томонларнинг келишувига кўра, меҳнат шартномаси беш кунлик ёки олти кунлик иш ҳафтасига алмаштириш ҳуқуқи билан тўрт кунлик иш ҳафтасини белгилашга имкон беради», — дейилади қонун лойиҳасида.

Тўрт кунлик иш ҳафтаси билан қўшимча ишларнинг умумий давомийлиги ойига ўн икки соатдан ва йилига бир юз йигирма соатдан ошмаслиги керак.

«Беш кунлик, олти кунлик ёки тўрт кунлик иш ҳафтаси билан умумий дам олиш куни якшанба ҳисобланади. Беш кунлик ва (ёки) тўрт кунлик иш ҳафтаси билан иккинчи ёки учинчи дам олиш кунлари жамоа шартномаси ёки меҳнат қоидалари билан белгиланади», — дейилади ҳужжатда.