Европа иттифоқида Россия билан соддалаштирилган виза режимини тўхтатиш тўғрисидаги қарор Россиянинг Украинага бостириб кириши фонида қабул қилинган.
Россиянинг Украинага бостириб кириши фонида қабул қилинган Шенген визалари олишнинг соддалаштирилган тартиби тўғрисидаги Россия билан келишувни тўхтатиб туриш тўғрисидаги Европа иттифоқи қарори 12 сентябр, душанба куни амал қила бошлади.
Аввалроқ, 9 сентябр куни у Европа иттифоқининг расмий журналида чоп этилган ва шу куни кучга кирган эди. ЕИнинг Россия билан виза тартибини соддалаштиришни тўхтатиш тўғрисидаги қарор 12 сентябрда кучга кириши керак бўлганлиги Европа иттифоқи якуний маъқулланганидан кейин 48 соат ичида Россияни бу ҳақда хабардор қилиши шартлиги билан изоҳланади.
Шартноманинг тўхтатилиши россияликлар учун виза тўлови 35 евродан 80 еврога ошишини билдиради. Бундан ташқари, энди виза бериш шартлари ва бунинг учун талаб қилинадиган ҳужжатлар ҳажми ортади. Кўп марталик визалар бериш қоидалари қатъийлаштирилади.
Айни пайтда, Еврокомиссия (ЕК) шошилинч сабабларга кўра саёҳат қилаётган россияликлар, хусусан, Европа иттифоқи фуқароларининг оила аъзолари, журналистлар, диссидентлар ва фуқаролик жамияти вакиллари учун Европа иттифоқига эшиклар очиқ эканлигини таъкидлади. Ушбу тоифадаги Россия фуқаролари учун Европа иттифоқи мамлакатлари, масалан, виза тўловини яна камайтириши ёки ҳатто ундан бутунлай воз кечиши мумкин, деб таъкидлади ЕК.
Шенген ҳудудига Европа иттифоқининг 22 давлати, шунингдек, Норвегия, Лихтенштейн, Исландия ва Швейцария киради. Россия ва Европа иттифоқи ўртасида виза тартибини соддалаштириш тўғрисидаги битим 2007 йилдан бери амал қилади. 2022 йил 24 февралда Москванинг Украинага қарши кенг кўламли уруши бошланганидан бери соддалаштирилган виза режими Россия ҳукумати вакиллари, шунингдек, Россиядан келган дипломатлар ва тадбиркорлар учун бекор қилинди.
Бир кун аввал Черногория ташқи ишлар вазири Ранко Кривокапич ўз мамлакатининг россияликлар киришига чеклов қўшилиши тарафдори эканини айтди. Агар ҳукумат бу таклифни қўллаб-қувватласа, Подгорица Россия билан виза режимини жорий қилиши мумкин.
«Черногория Европа иттифоқининг содиқ ҳамкори ва ташқи ишлар вазири мамлакатимиз бу қарорда ҳозиргача бўлгани каби Европа иттифоқига тўлиқ қўшилиши керак, деб ҳисоблайди», — дея таъкидлади мамлакат ТИВ.
