Эрдўған Путин билан учрашувда Россия гази учун чегирмага эришиш ниятида – Bloomberg

Туркия президенти Ражаб Тоййиб Эрдўған Самарқандда россиялик ҳамкасби Владимир Путин билан учрашувида газ учун 25 фоизлик чегирмага эришиш ниятида, деб хабар берди Bloomberg ўз манбасига таяниб.

«Эрдўған Россия президенти Владимир Путин билан учрашуви чоғида табиий газ учун 25 фоизлик чегирмага ва энергия учун тўловларнинг бир қисмини лирада тўлаш тўғрисида келишувга эришмоқчи», — дейилади агентлик хабарида.

Шунингдек, хабарда айтилишича, Туркия президенти Россия билан молиявий алоқаларни янада мустаҳкамлашга ҳаракат қилади.

Маълумот берилишича, Туркия бу йил 50 млрд долларлик табиий газ сотиб олади ва Россия унинг энг йирик энергия таъминотчиси ҳисобланади.

Москванинг позицияси билан таниш бўлган манбалар чегирма тўғрисидаги хабарни тасдиқламади.

Аввалроқ Россия бош вазири ўринбосари Александр Новак икки мамлакат ўзаро ҳисоб-китобларни рублда олиб боришни бошлашга келишиб олганини айтганди.