ОАВ: Путин қўмондонликдан Херсонни тарк этмасликни талаб қилди

The New York Times газетасининг ёзишича, Россия президенти Владимир Путин сўнгги ҳафталарда Украинага қарши урушни тўғридан тўғри стратегик режалаштириш билан шуғулланган ва шу қаторда ҳарбий қўмондонларнинг Херсондан чекинишга рухсат бериш ҳақидаги илтимосларини рад этган. Улар шахсий таркиб ва ҳарбий техникани сақлаб қолиш учун шаҳарни тарк этиб, уюшқоқлик билан Днепр орқасига чекинишни таклиф қилишди, деб ёзади газета 23 сентябр, жума куни Америка маъмурияти вакилларига таяниб. 

«Аммо бундай чекиниш Путиннинг урушдаги мағлубиятини тан олиш бўйича яна бир камситувчи ҳолат бўлади ва Украинага бир ой ичида иккинчи йирик ғалабасини олиб келади. Херсон дастлабки босқин пайтида руслар томонидан қўлга киритилган биринчи йирик шаҳар бўлиб, Москванинг назорати остидаги ягона област маркази бўлиб қолмоқда. Унинг қайтарилиши Украина президенти Володимир Зеленский учун катта ютуқ бўларди», дея ёзади газета.

NYT’нинг ўта махфий разведка маълумотларидан хабардор манбаларига кўра, Путиннинг Херсондан рус қўшинларини олиб чиқишдан бош тортгани россиялик ҳарбий хизматчилар руҳий ҳолатининг пасайишига олиб келди, улар таъминот йўналишлари ва Днепр бўйлаб жойлашган асосий гуруҳдан узилиб қолган. 

АҚШ расмийларига кўра, Путин ва унинг генераллари ўртасидаги Херсондаги фронт чизиғи бўйича келишмовчиликлар Украина жанубидаги вазият уришаётган томонлар учун қанчалик оғир эканини кўрсатади. Украина шимоли-шарқда ютуқларга эришганига қарамай, Херсон атрофидаги ҳудуд Киев ва Москва учун катта стратегик аҳамиятга эга бўлган муҳим операциялар театридир, деб ёзади газета. Агар Украина Қуролли кучлари Россия қўшинларини яна ҳам орқага суриб ташласа, Путин қурилиши учун жуда кўп куч сарфлаган Қрим кўприги таҳдид остида қолади, дея таъкидлайди газета. 

Ўтган ёзда Украина ҳарбийлари Херсондаги Днепрдан ўтувчи ягона автомобиль кўпригига бир неча бор ракета ҳужумларини уюштирди, натижада у жиддий зарар кўрди ва транспорт ҳаракати учун ёпилди. Тахминларга кўра, зарбалар Американинг HIMARS ялпи ўт очиш реактив тизимларидан берилган.