«Зарар бор» – Путин Украина ҳужумлари, бензин тақчиллиги ва Анкориж келишуви ҳақида

28 июн куни кечқурун Кремл Владимир Путиннинг пропагандачи Павел Зарубинга берган 25 дақиқалик «интервю»сини тақдим этди. Эълон қилинган видеода президент мухбирдан бошқа томонга қараган ҳолда саволларга жавоб беришда телесуфлёрдан фойдалангани билиниб туради. Кремл матбуот хизмати Зарубиннинг номини тилга олмаган, уни шунчаки «россиялик журналист» сифатида кўрсатган. «Интервю» давомида Путин Россияда ёқилғи тақчиллиги «жиддий даражада эмаслиги», бу муаммога қарши курашиш учун ҳукумат ҳаво ҳужумидан мудофаа воситаларини кучайтирмоқчи эканини айтиб ўтган. У Украина икки томон ҳам ичкари ҳудудларга зарбалар беришни тўхтатишини назарда тутувчи янги таклиф билан чиққани, аммо Кремл уни рад этганини ҳам айтган. Шунингдек, Путин «Анкориж руҳи»га тўхталиб ўтган – аммо Кремл сайтида бу парча қирқиб ташланган. Қуйида унинг баёнотидан асосий тезислар келтирилади.

Ёқилғи инқирози ҳақида

РФ президенти инфратузилма объектлари бўйлаб зарбалар «муаммо туғдираётгани»ни тан олган. «Биз ҳозир маълум бир тақчилликни кузатяпмиз, аммо ўта жиддий эмас», – деган у. Путиннинг фикрича, ёқилғи тақчиллигига қарши курашида биринчи галда қилиниши керак бўлган иш – бу «талаб юқори бўлган ҳаво ҳужумидан мудофаа тизимларини тез ва сезиларли даражада кўпайтириш»дир.

Шунингдек, унинг фикрича, нефтни қайта ишлаш заводларини «тезда таъмирлаш» ва ёқилғининг «керакли миқдордаги импорти»ни таъминлаш керак бўлади.

«Зарар бор, – дея қайд этади у. – Аммо шикастланган объектларнинг барчаси анча тез тикланмоқда ва юзага келаётган муаммолар жиддий тус олмаяпти».

«Бизда барчаси барқарор ва катта хавфсизлик чегараси билан ишлайди».

РФ президенти Қримга ёқилғи етказиб бериш ҳажми «қуруқлик орқали ҳам, сув орқали ҳам оширилиши»ни маълум қилган – Украина қуролли кучлари Россиянинг асосий қисмини мазкур ҳудуд билан боғловчи Р-280 «Новороссия» трассаси бўйлаб зарбаларни кўпайтириши натижасида яриморолда май ойидаёқ бензин тақчиллиги юзага келганди. Путин таъминот айнан қандай йўлга қўйилишига аниқлик киритмаган, аммо «вазифа ҳал этилиши»га ишонч билдирган.

Путиннинг фикрича, Украина қуролли кучларининг нефтни қайта ишлаш инфратузилмасига зарбалари – «россияликларда ўз кучларига ишончсизлик уйғотиш, Россия жамиятида бўлинишга олиб келиш»га қаратилган «ахборот операцияси»нинг бир қисми ҳисобланади.

«Биз уларга бундай имкон бермаймиз».

«Бизнинг инфратузилмаларимиз бўйлаб берилаётган зарбалар фронтдаги вазиятга, ҳарбий тўқнашув чизиғига умуман таъсир кўрсатгани йўқ», – дея қўшимча қилади у.

Украинанинг янги таклифи ҳақида

Путиннинг хабар қилишича, Украина ҳукумати Россияга «ҳар икки томон бир-бирининг ичкари ҳудудларига зарба беришни тўхтатиши»ни таклиф қилган. У Кремлда бу таклиф қабул қилинмаганини билдирди. «Бизнин Украина ичкарисига берилаётган жавоб зарбаларимиз анча кучлироқ, таъсирчан ва тўғрисини айтганда, вайронкор бўлиб, чинакамига жиддий оқибатларга олиб келмоқда», — дея қайд этган Путин.

Бундан ташқари, РФ президенти айтишича, Украина Донецк, Луҳанск, Херсон ва Запорижжя областларида ҳарбий ҳаракатларни қисқартиришни, қолган ҳудудларда эса жангларни бутунлай тўхтатишни таклиф қилган. Россия бу таклифни ҳам рад этган.

«Агар биз бунга рози бўлсак, бу Украина қуролли кучларига Миколайив области, Днипропетровск области, Харкив ва Суми областларидан, шунингдек, давлат чегарасининг бошқа айрим участкаларидан қўшинларни олиб, бу бўлинмаларни юқорида айтилган тўртта регионга ташлаш имконини беради», – дейди Путин.

«Афтидан, улар буни Украина қуролли кучлари шахсий таркибидаги ҳалокатли танқислик шароитида ўзлари учун нажот бўлиши мумкин деб ўйлашади. Аммо Киев режимини қутқариш бизнинг режаларимизга кирмайди».

Шундан кейин Путин нутқининг катта қисмини фронтдаги вазият бўйича ўзидаги маълумотларни айтиб беришга бағишлаган. Faridaily нашри Путин бу маълумотларни суфлёрдан ўқиб бергани, Зарубинга эмас, бошқа томонга қараб гапиргани ва баъзи ўринларда ёзувни яхшироқ кўриш учун олдинга кўзларини қисиб қараганини қайд этган.

«Анкориж руҳи» ва Трамп ҳақида

Путин Анкориждаги саммитда чиндан ҳам келишув бўлмаганини тасдиқлаган.

«„Анкориж руҳи“ ҳеч қандай расмий ҳужжат билан расмийлаштирилмаган, ҳеч ким ҳеч қандай имзо қўймаган эди».

Шунга қарамай, у ерда урушни якунлаш учун «муросалар ва маълум имкониятлар» муҳокама қилинган.

Бир неча кун олдин АҚШ Давлат котиби Марко Рубио Аляскадаги саммит чоғида фақат Россиянинг Украина билан урушини тугатиш бўйича таклифлар муҳокама қилингани, аммо ҳеч қандай келишувга эришилмаганини айтганди. Ўз навбатида, РФ ТИВ раҳбари Сергей Лавров агар АҚШ можарони ҳал қилиш бўйича таклифларни илгари сурган, Россия эса уларга қўшилган бўлса, унда «келишув бўлмаганди» деб бўлмаслигини таъкидлади.

Путин ғарб нашрларида Европа етакчилари АҚШ президенти Доналд Трампнинг Россия ва Украина урушидаги кучлар нисбати ҳақидаги фикрини ўзгартиришга эришгани ҳақида ёзилган хабарлар юзасидан ҳам муносабат билдирган.

«Бундайлигига шубҳам бор. Трамп – етук сиёсатчи, шунчаки тажрибали сиёсатчи бўлишдан кўра етукроқ».

«Биз инсонмиз, ҳаммамиз рақибларимизни ҳам, иттифоқчиларимизни ҳам тинглаймиз, қулоқ соламиз ва ўз нуқтайи назаримизга қандайдир тузатишлар киритишимиз мумкин. Лекин бутунлай ўзгартирмаймиз. Ҳар ҳолда, менга бу ҳақда ҳозирча ҳеч нарса маълум эмас, мен бу ҳақда ҳеч нарса билмайман», – дейди Путин.