Қирғизистонда 12 йиллик мактаб таълими жорий этилади 

Қирғизистон Халқ таълими вазири вазифасини бажарувчи Уланбек Мамбетақунов Жогорку Кенеш йиғилишида мактабларда 12 йиллик таълим тизимини жорий этишга тайёргарлик кўрилаётганини маълум қилди. 

«12 йиллик таълим тизимини жорий этишга тайёргарлик бошланди. Аммо бу давлат таълим стандартлари тайёр бўлгач амалга оширилади. Қолаверса, ўқув базаси ҳам тайёр бўлиши керак», — деди Уланбек Мамбетақунов. 

Аввалроқ, 2023 йилдан бошлаб 12 йиллик мактаб таълимига ўтиш режалаштирилгани, нолинчи синф бекор қилинадиган янги таълим модели жорий этилиши ҳақида хабар берилганди. 

Ўшанда собиқ таълим ва фан вазири Алмазбек Бейшеналиев энди болалар биринчи синфга етти ёшда эмас, олти ёшда боришини айтди. Унинг фикрига кўра, шунда Қирғизистон таълим тизими «жаҳон стандартларига жавоб берар эди». 

Кейинчалик 12 йиллик мактаб таълимига ўтиш 2024-2025 ўқув йилига қолдирилди. Лойиҳани амалга ошириш учун Осиё тараққиёт банкидан 40 млн доллар миқдорида маблағ (ярми кредит, ярми грант) олиш режалаштирилган.