Украина Олий Радаси Ичкерияни Россия томонидан босиб олинган ҳудуд деб эълон қилди

Украина Олий Радаси Ичкерия Чечен Республикасини Россия томонидан «вақтинча босиб олинган ҳудуд» деб эълон қилиш ва «чечен халқи геноциди»ни қоралаш ҳақидаги қарорни қабул қилди.

Ҳужжат қабул қилиниши учун 287 депутат овоз берган.

Шу билан бирга Украинадаги айрим нашрлар ва сиёсатчилар Олий Рада гўёки Ичкерия суверенитетини, яъни мустақиллигини тан олгани ҳақида ёзишган, аммо аслида бундай эмас. Июл ойида депутатлар Олексий Гончаренко ва Муса Магомедов Ичкерия мустақиллигини тан олиш тўғрисидаги резолюция лойиҳасини киритганди, аммо Украина парламентида бу масала ҳали кўриб чиқилмаган.

Россиянинг Украинага қарши урушида чечен махсус бўлинмалари ҳам иштирок этмоқда, Чеченистон раҳбари Рамзан Қодиров эса Украинадаги «махсус ҳарбий амалиёт»нинг ашаддий тарафдорларидан саналади. Урушда Ичкерия мустақиллиги тарафдорлари эса Украина томонида туриб жанг қилмоқда — 2022 йил августида Қодиров уларга қонли адоват эълон қилган.

Ўзини ўзи эълон қилган Ичкерия Чечен Республикаси советлар иттифоқи парчаланганидан 1994 йил 14 январига қадар собиқ Чечен-Ингушетия АССР ҳудудининг бир қисмида мавжуд бўлган (ҳозирги Чеченистон ва Ингушетия). Чечен Ичкерия Республикаси 1991 йил июлида мустақиллик эълон қилган, унинг биринчи президенти Чечен халқи умуммиллий конгресси раҳбари Жоҳар Дудаев бўлган. 1993 йил 9 январидан Россия ҳукумати бу ҳудудни РФ таркибидаги Чечен Республикаси деб ҳисоблайди, шунингдек Ичкерия БМТ аъзоларининг ҳеч бири томонидан тан олинмайди. Республика мустақиллик эълон қилгани туфайли ҳарбий низо келиб чиқади, унинг ортидан Россия ҳукумати ва чечен тузилмалари ўртасида Биринчи чечен уруши бошланади. Россия армияси Ичкерияни куч билан Россия таркибига қайтаришга уринади, аммо 1996 йилда қўшинлар Чеченистондан олиб чиқилади. 2000 йилда, Иккинчи чечен уруши якунида Ичкерия алоҳида давлат сифатида тугатилади ва Россия таркибидаги республикага айланади.