Қўшимча функционаллар
-
Тунги кўриниш
АҚШ Украина бўйича Аляскада келишув бўлганини рад этди
АҚШ давлат котиби Марко Рубио Алясканинг Анкориж шаҳрида ўтган АҚШ–Россия саммитида Украинадаги урушни тугатиш шартлари бўйича ҳеч қандай келишув имзоланмаганини билдирди. Унинг сўзларига кўра, музокаралар давомида фақат таклифлар муҳокама қилинган, аммо томонлар бирор битимга келмаган.
Марко Рубио 25 июн куни журналистлар билан мулоқот чоғида Москванинг Вашингтонни «Аляскада эришилган келишувларга амал қилмаётганлик»да айблашига муносабат билдирди.
«Ҳеч қандай келишув бўлган эмас. Аляскада фақат таклиф бўлган, аммо келишув бўлмаган. Агар келишувга эришилганида эди, Украинадаги уруш аллақачон тугаган бўларди», — деди АҚШ давлат котиби.
Унинг таъкидлашича, АҚШ президенти Доналд Трамп маъмурияти Украинадаги урушни узоқ муддатли тинчлик келишуви орқали якунлаш учун конструктив рол ўйнашга тайёр.
Рубионинг сўзларига кўра, Украинадаги уруш ҳар ой ўн минглаб инсонларнинг ҳаётига зомин бўлмоқда. У ҳафтасига тахминан 5 минг нафар ҳарбий ҳалок бўлаётганини, қурбонларнинг катта қисми россияликлар эканини қайд этди.
Россия қандай таклифларни илгари сурган?
Журналистлардан бири музокараларда таклиф ким томонидан билдирилганини сўраганида, Рубио Россия томони Донецк вилоятининг тўлиқ назоратини қўлга киритиш каби талабларни илгари сурганини айтди.
«Россия Донецк вилоятининг тўлиқ ўз назоратига ўтишини хоҳлаган ва бошқа қатор шартларни ҳам қўйган. Аммо ҳеч қандай келишув бўлмаган. Агар шундай бўлганида, уруш тугаган бўларди», — деди у.
Москва Вашингтонни келишувларга амал қилмасликда айблаб келмоқда
АҚШ ва Россия президентлари Доналд Трамп ҳамда Владимир Путин иштирокидаги саммит 2025 йил август ойида Алясканинг Анкориж шаҳрида бўлиб ўтган.
Сўнгги ойларда Россия расмийлари АҚШ томонини ушбу учрашувда эришилган келишувларни бажармаётганликда бир неча бор айблади. Бундай баёнотлар билан Россия президенти ёрдамчиси Юрий Ушаков, ташқи ишлар вазири Сергей Лавров ва Кремл матбуот котиби Дмитрий Песков чиққан.
2025 йил декабр ойида Владимир Путин ҳам Москва саммит арафасида Вашингтон таклиф қилган муайян муросаларга рози бўлганини билдирган эди.
Унинг сўзларига кўра, Россия делегацияси Анкорижда Америка томонининг таклифларини асосан қабул қилган ва шу боис Москвани музокараларга қарши чиқишда айблаш асоссиз.
Оммавий ахборот воситалари ёзган эҳтимолий шартлар
2025 йил август ойида Financial Times нашри манбаларига таяниб ёзишича, Анкориждаги музокараларда Россия Украина назоратидаги Донецк вилоятининг қолган қисмини ўз ихтиёрига бериш эвазига Запорижжя ва Херсон вилоятларидаги фронт чизиғини музлатишни таклиф қилган.
Нашр суҳбатдошларига кўра, Москва Украина қўшинлари Донецк вилоятидан чиқиб кетса, янги ҳудудларни эгаллаш учун ҳужум қилмасликка ваъда берган.
Reuters агентлиги эса ўз манбасига таяниб, Путин музокараларда Украина қўшинларини Луханск вилоятидан ҳам олиб чиқишни талаб қилганини хабар қилган.
