Украинадаги уруш туфайли Европа Иттифоқи мудофаа ва қочқинлар учун харажатларни оширади

Европа Иттифоқи мамлакатлари молия вазирлари Украинадаги уруш сабаб бўлган асосий муаммоларни ҳал қилишга қаратилган бюджетни қабул қилишди. Хусусан, 2023 йилга мўлжалланган янги молиявий режада қўшни давлатларни қўллаб-қувватлаш, ҳарбий ҳаракатчанлик ва энергетика инқирозидан чиқиш учун харажатларни ошириш кўзда тутилган.

«Уруш давом этмоқда. Бундай қийин пайтларда биз қўшниларимизга ёрдам беришимиз, Молдова ва Украинага ёрдам беришимиз керак, - дея тушунтирди Европарламентнинг бюджетлар бўйича махсус қўмитаси аъзоси Николай Стефанута 15 ноябрь, сешанба куни. - Бундан ташқари, Европа Иттифоқи зудлик билан ҳарбий ҳаракатчанлигини кучайтириши керак, бу тўғридан тўғри содир бўлиши керак».

Шундай қилиб, жами 186,6 миллиард евролик бюджетда қўшни давлатларга ёрдам кўрсатиш учун бюджетга деярли 15 миллиард евро қўшилган. "Erasmus плюс" талабалар дастури учун 3,7 миллиард евро ажратилди - бу Украинадан қочиб кетган мактаб ўқувчилари ва талабаларнинг таълимига қўшилган ҳиссадир. «Украиналик олимлар ва талабаларга Европа Иттифоқи бюджети ҳисобидан Европа университетларида интеграциялашувига ёрдам бериш учун ушбу дастур харажатлари сезиларли даражада оширилди», — деди Стефанута.

Озиқ-овқат ва энергетика инқирози туфайли транспорт ва энергетикага ҳам қўшимча ресурслар ажратилди, юқори самарали трансчегаравий транспорт инфратузилмасини ривожлантириш учун Connecting Europe Facility дастурига 3 миллиард евро йўналтирилади. Ушбу дастурда алоҳида эътибор Европа Иттифоқи ва Украина ўртасидаги «бирдамлик чизиқлари»ни мустаҳкамлашга қаратилади.

Европа Иттифоқида фуқаролик ва ҳарбий ҳаракатчанликни яхшилаш учун Европа Иттифоқи бюджетидан қўшимча деярли 300 миллион евро ажратилади. Европа мудофаа фондига ва Европа мудофаа саноатини мустаҳкамлаш учун бир миллиард евродан ортиқ маблағ йўналтирилади.

23 ноябрь куни ЕИ Кенгаши ва Европарламент томонидан расман қабул қилингандан сўнг, янги бюджет ЕИга Россиянинг Украинага қарши тажовузкор уруши оқибатларини Украинанинг ўзида ҳам, унга қўшни мамлакатларда ҳам, енгиллаштириш учун катта маблағларни сафарбар қилиш имконини беради. Тасдиқлаш жараёни якунлангач, Еврокомиссия Украина ва энг кўп украиналик қочқинларни қабул қилган Европа Иттифоқи мамлакатларига ёрдам беришда давом этиши мумкин бўлади.

Ушбу бюджетни мустаҳкамлашдан ташқари, Европа Комиссияси Украинага 2023 йил учун тахминан 18 миллиард евро миқдорида мисли кўрилмаган макромолиявий ёрдам пакетини таклиф қилди. У имтиёзли шартларда кредит шаклида берилади ва мунтазам траншларда тўланади.