Туркия Россия нефтини ташувчи суғурталанмаган танкерлар учун бўғозларни ёпади

Россия нефтини ташувчилар учун суғурта олиш санкциялар туфайли муаммога айланади.

Фото: Reuters

Туркия 2022 йил 1 декабрдан бошлаб нефт ташувчилардан Босфор ва Дарданел бўғозларидан ўтиш учун суғурта талаб қилади.

Bloomberg хабарига кўра, янги қоидалар Европа Иттифоқи ва Буюк Британиянинг Россияга қарши киритган санкциялари билан боғлиқ, гарчи Туркия уларга расман қўшилмаган бўлса-да.

Янги қоида 1 декабрдан кучга киради, бу эса Россия нефтини ташувчи танкерларнинг суғурта олишини анча қийинлаштиради.

5 декабрдан бошлаб ЕИ ва Буюк Британия Россия нефтига қарши янги санкциялар киритмоқда, улар энергия ресурсига чекланган нархларни белгилаш билан боғлиқ. Ушбу нархлар белгиланганидан кейин, кемалар суғурта полиси олиш учун айнан шу нархда сотиб олинган нефтни ташишига тўғри келади.

Сўнгги 6 ой давомида Россия Қора денгиздаги Новороссийск порти орқали кунига деярли 650 минг баррел нефт жўнатган.

Европа Иттифоқи 2023 йилгача Россиядан хом ва қайта ишланган нефтнинг денгиз импортини тақиқлашни режалаштирмоқда. Европа Иттифоқи Россия нефт маҳсулотлари импорти ва транзити бўйича санкциялар жорий этиш учун босқичма-босқич ўтиш даврини белгилади, бу давр келаси йилнинг февралида якунланиши керак.

Аввалроқ, АҚШ молия вазири Жанет Йеллен Қўшма Штатлар Россия нефти нархини бир баррел учун 60 долларгача чеклаши мумкинлигини айтган эди.

2022 йил сентябрь ойи охирида Россиянинг нефт экспортидан тушган даромади 15,3 миллиард долларгача қисқарди, бу жорий йилдаги энг паст кўрсаткичдир.