Эрдўған НАТО етакчиларига шахсий тўппонча совға қилди

Туркия президенти Ражаб Тоййиб Эрдўған Анқарада бўлиб ўтган НАТО саммитидан сўнг Европа комиссияси раҳбари Урсула фон дер Ляйен, Европа кенгаши раиси Антониу Кошта ва бошқа Европа етакчиларига ўйма нақшли тўппонча ва ўқ-дори совға қилди, деб хабар берди Reuters манбаларга таяниб.

Коштанинг хавфсизлик хизмати қуролларни текшириш учун олиб кетди. Европалик амалдорларнинг сўзларига кўра, Белгияда қурол муомаласининг қатъий қоидалари туфайли у ва фон дер Ляйен совғани шахсан сақлаши даргумон.

Буюк Британия Бош вазири Кир Стармер ва Нидерландия ҳукумати раҳбари Роб Йеттен тўппончаларни Туркияда қолдиришга қарор қилди. Нидерландия ҳукумати вакили Йеттеннинг қуроли Анқарадаги элчихонада қолганини тасдиқлади.

Кузатувчиларнинг фикрича, бундай ғайриоддий дипломатик совға Туркия мудофаа саноатининг ривожланиши ва Туркиянинг йирик ўқотар қурол экспортчиларидан бири сифатидаги мақомини таъкидлаш учун мўлжалланган, бироқ бир вақтнинг ўзида саммитнинг кўплаб иштирокчилари учун ҳуқуқий ва логистика қийинчиликларини келтириб чиқарди.

НАТО саммити 7-8 июль кунлари Туркия пойтахтидаги Бештепа президент мажмуасида бўлиб ўтди. Унда альянснинг барча 32 мамлакати етакчилари ва бошқа давлатлар делегациялари иштирок этди, Европа Иттифоқидан эса Кошта ва фон дер Ляйен қатнашди.