Европа Иттифоқи Украинага макромолиявий ёрдамнинг навбатдаги қисмини ўтказди

Украина ЕИдан 2,5 миллиард евро миқдорида макромолиявий ёрдамнинг навбатдаги траншини олди. Бу ҳақда Володимир Зеленский анъанавий кечки видеомурожаатида маълум қилди.

Фото: AP

Унинг сўзларига кўра, Киев келаси йил учун Европа «макрофин дастури»нинг 18 миллиард евро миқдорида тасдиқланишини кутмоқда, бундан ташқари, Қўшма Штатлар яқин орада бевосита Украина бюджетини қўллаб-қувватлаш учун 4,5 миллиард доллар миқдорида қўшимча маблағ юборади.

«Дўстларимизнинг бундай қарорлари туфайли биз ижтимоий барқарорликни сақлаб қоламиз ва Россиянинг барча зарбаларига қарамай, биз ўз ижтимоий мажбуриятларимизни бажарамиз», — деди Зеленский.

Украина президенти, шунингдек, бутун мамлакат бўйлаб тўрт мингга яқин «Енгилмас нуқталар» жойлаштирилганини айтди - бу Россиянинг ўққа тутилиши натижасида электр таъминотидаги узилишлар фонида одамларни қўллаб-қувватлашга қаратилган янги лойиҳа.

Бу пунктлар бепул ва кеча-ю кундуз ишлайди, «барча асосий хизматлар» – электр энергияси, мобил алоқа ва интернет, иссиқлик таъминоти, сув, биринчи тиббий ёрдам қутисини таклиф этади.

«Ишончим комилки, биз бир-биримизга ёрдам бериб, бу қишни биргаликда енгамиз», — деди Зеленский.

Бундан олдин Украинада доимий электр ўчиришлар катта эҳтимол билан март ойининг охиригача давом этиши хабар берилганди. Бу ҳақда Украинанинг электр ва газ етказиб берувчи YASNO ширкати раҳбари Сергей Коваленко маълум қилди.

У Facebook'даги саҳифасида ёзганидек, ҳозирда Украина энергетикаси ёмон об-ҳавога қарамай, Россия зарбаларидан жабр кўрган электр тармоқларини тиклашни янада қаттиқроқ совуқ ҳаво бошланишидан олдин якунлаш учун барча саъй-ҳаракатларини амалга оширмоқда. Шунга қарамай, 21 ноябрь куни ҳам барқарорлаштириш, ҳам фавқулодда ўчиришга яна мурожаат қилиш керак бўлди.

«Ҳозир ўчиришлар камайган бўлса-да, мен ҳамма украиналиклар март ойи охиригача узилишлар режимида яшаши кераклигини тушунишини истайман», — деди Коваленко. Унинг сўзларига кўра, агар Россия ўққа тутилиши тўхтаса, электр тақчиллиги бутун мамлакат бўйлаб тақсимланиши мумкин бўлади, ўшанда ўчиришлар камроқ бўлади ёки ҳатто бутунлай тўхтайди.

Аммо агар зарбалар давом этса ва энергия тизими яна шикастланса, «нафақат соатлик барқарорлаштиришни тўхтатиш, балки фавқулодда ўчиришларни ҳам қўллаш керак бўлади, бунинг натижасида электр энергияси жуда узоқ вақт давомида бўлмаслиги мумкин», деб огоҳлантирди етказиб берувчи компания раҳбари.

#Украина #Европа Иттифоқи