Дунёдаги биринчи ногирон космонавт коинотга учади

Дунёнинг биринчи пара-космонавти номи маълум бўлди, у паралимпия спринтери Жон Макфолл.

Фото: Reuters

Европа космик агентлиги хабарига кўра, британиялик Жон Макфолл келажакда космик парвозлар учун ўқитиладиган 17 кишидан иборат янги отрядга қўшилди.

«Бу жуда ҳайратланарли воқеа бўлди, чунки оёғи ампутация қилинган одам сифатида космонавт бўламан деб ҳеч ўйламаган эдим, шунинг учун ҳаяжон жуда катта», деди бўлажак космонавт журналистларга берган интервюсида.

40 ёшли Макфолл жиддий мотоцикл ҳалокатидан кейин 19 ёшида ўнг оёғидан ажралган. Протезлашдан сўнг у спорт билан шуғулланиб, Британия паралимпия терма жамоасига кирди ва 2008 йилда Пекинда бўлиб ўтган ёзги Паралимпия ўйинларида 100 метрга югуришда қатнашиб, 13,08 сония натижа кўрсатиб, бронза медалини қўлга киритди.

Европа космик агентлиги 2021 йилда ногирон космонавт лавозимига танлов эълон қилди. Жами 257 та ариза келиб тушди, Жон Макфолл психологик, когнитив ва жисмоний тест натижаларига кўра танлаб олинди.