10 ойда мактабгача таълим тизимида 380 та коррупцион жиноят содир этилган

Мактабгача таълим вазири, вазирлик ҳузуридаги жамоатчилик кенгаши ҳамда ОАВ вакиллари билан анжуман ташкил этилди. Унда Бош прокуратура бошқармаси катта прокурори Каримжон Мусашайхов тизимда аниқланган коррупцион ҳолатлар, талон-торожликлар бўйича статистик рақамларни эълон қилди. 

Қайд этилишича, 2019 йилда 167 нафар, 2020 йилда 131 нафар, 2021 йилда эса 153 нафар мактабгача таълим тизими ходими томонидан коррупцион жиноятлар содир этилган. Сўнгги 10 ойда кузатилган 380 та ҳолатнинг 200 тага яқини ўзганинг мол-мулкини талон-торож қилиш билан боғлиқ.

Шунингдек, расмий вакилнинг айтишича, жиноятларни содир этишда вазирлик тизимидаги иш ҳақи, рағбатлантириш, давлат харидларини қиммат нархларда сотиб олиш, қурилишга, ОНМТТ учун ажратилган субсидия маблағларини талон-торож қилишга йўл қўйилган.

Вазирликнинг Kun.uz’га берган маълумотларига кўра, ўтган вақт давомида бошқарма ходимлари томонидан 14 та ҳолатда аниқланган қонунбузилиш ишлари Бош прокуратурага оширилган, 18 та ҳолатда коррупцион жиноятларга алоқадорлиги учун ходимлар билан тузилган меҳнат шартномалари бекор қилинган, 8 та ҳолатда ҳуқуқни муҳофаза қилувчи органлар билан ҳамкорликда тезкор тадбирлар ўтказилган, 8 та ҳолатда эса интизомий жазо турлари қўлланган.