«Рақамимни айнан Роналду учун бердим». Жалолиддин Машарипов Криштиануни «Ан-Наср»да кутишаётганини тасдиқлади

«Ан-Наср» клуби ҳамда Ўзбекистон миллий жамоаси яримҳимоячиси Жалолиддин Машарипов Tribuna.uz мухбири билан суҳбатда жамоадаги рақамини Криштиану Роналду учун бўшатиб қўйганини маълум қилди.

Фото: Ан-Наср

ОАВларда Саудия Арабистонининг «Ан-Наср» клуби Криштиану Роналдуга таклиф билан чиққани, португалиялик юлдузга 2,5 йиллик шартнома ва 200 миллион евро маош таклиф қилингани ҳақида хабарлар кўпайди.

Турли манбалар овоза қилган бу хабарга кейинчалик Роналдунинг ўзи муносабат билдирди ва «Ан-Наср»га ўтишим ҳақидаги гап-сўзларни қаердан оляпсизлар, билмайман. Мен у клубга ўтмайман», қабилида гапирди.

Бугун эса Ўзбекистондаги спортга ихтисослашган интернет ОАВлари «Ан-Наср»да тўп тепаётган ҳамюртимиз Жалолиддин Машарипов ўзининг 7-рақамини 77-рақамга алмаштиргани ҳақида ёздилар. Бу гўё Жалолиддин ва «Ан-Наср» Криштианунинг келишига тайёргарлик кўраётгандек тақдим этилмоқда. Масалага ойдинлик киритиш мақсадида Tribuna.uz мухбири Жалолиддин Машарипов билан боғланди.

«Клуб Роналдуга таклиф билан чиққани рост. Таклиф қилинган пуллар миқдори ва шартнома муддати ҳам бор гап. Менга клуб раҳбарияти мурожаат қилди: «Жалолиддин, рақамингни олсак, хафа бўлмайсанми? Биз Роналдуга таклиф юбордик, у таклифни қабул қилса ва жамоага келишни ихтиёр этса, биз унга бу рақамни бўшатиб қўймоқчимиз», дейишди. Мен эса бунда муаммо йўқ, менга 77-рақамни беринглар, дедим. Агар Роналду клуб таклифини қабул қилмаса, кейинги мавсумдан 7-рақамда яна ўзим ўйнайвераман», - деди Ўзбекистон миллий жамоасининг ҳужумкор яримҳимоячиси.

Шунингдек, Машарипов Криштиану Роналдунинг жамоага келишини ўзи ҳам истаётганини айтиб ўтди: «Борди-ю у жамоага келса, бундан фақат хурсанд бўламан, чунки бу нафақат клуб ва Саудия футболи, балки мен учун ҳам катта воқелик бўлади. Бундай калибрдаги футболчи билан бирга тўп тепиш ҳаммага ҳам насиб қилавермайди. Очиғи, унинг келишини ўзим ҳам кутяпман. Бирга ўйнаш насиб қилса, ундан ўрганадиган нарсаларим кўп. Бу ривожланишимга ҳам ёрдам беради. Унинг «Наср»га келиши шахсан менинг карьерамдаги яна бир янги саҳифа бўлади», - деди Жалолиддин Машарипов Tribuna.uz мухбирига.

Эслатиб ўтамиз, 37 ёшли португалиялик ноябрда «Манчестер Юнайтед»ни тарк этгач, ҳалигача эркин агент саналади.

Аввалроқ, футболчи Чемпионлар лигасида иштирок этаётган клубда тўп суриш истагини билдираётган бўлса-да, унинг олдида «Ан-Наср»дан бошқа таклиф йўқлиги ҳақида маълум қилинганди.