Кўчадан 8 минг доллар ва 50 млн сўм топиб олган ИИБ ходими пулларни эгасига қайтарди

Йирик миқдордаги пулларни топиб олган ИИБ ходими бу ҳақда телеграм каналларда эълон берган ва шу йўл билан пулларни йўқотган йигитни топиб, унга омонатини топширган.

Самарқанд вилояти ИИБ ахборот хизматининг хабар беришича, вилоят ИИБ ташкилий бошқарма катта инспектори Алибек Балласов кўчадан топиб олган катта миқдордаги пулларни эгасига қайтарган.

Маълум бўлишича, инспектор якшанба куни оиласи билан дам олишга кетаётганда Самарқанд шаҳар Шодиёна маҳалласи ҳудудида сумкача топиб олган.

У сумкачани очиб кўрганида 8 минг доллар ва 50 млн пул борлигини кўрган. Инспектор маҳалла профилактика инспектори ҳамда маҳалла раисининг олдига бориб маҳалла аҳли томонидан очилган телеграм каналларда ичида пуллар бўлган сумкача топиб олгани ҳақида эълон берган.

Кейинги кун эрталаб фуқаролардан бири унга алоқага чиққан ва машинадан юк тушираётганида ичида 8 минг доллар ва 50 млн сўм бўлган сумкачаси тушиб қолгани ҳақида айтган.

Ўзаро суҳбат давомида сумкача шу фуқарога тегишли экани маълум бўлган. ИИБ ходими унинг омонатини қўлига топширган.

«Сумкачани қаерда тушириб қўйганимни билмаганим учун уни анча изладик. Бироқ эрталабгача топилмаган. Эрталаб телеграмдаги группалардан бирида топиб олинган сумкача ҳақида эълон берилгани ҳақида хабар топдик. Эълондаги телефон рақамига қўнғироқ қилиб сумкачанинг ичида бўлган пул миқдорини айтганимда сумкача меники экани ойдинлашди», дейди йигит.