“Очиқ-ойдин гапириш учун раҳбар ўзи тоза бўлиши керак” — Амрилло Иноятов тиббиётдаги коррупция ҳақида

4 феврал куни соғлиқни сақлаш вазири Амрилло Иноятов Наманган вилоятида соҳа мутасаддилари ва ОАВ вакиллари билан учрашув ўтказди.

Vodiy1.uz хабарига кўра, тадбир давомида вазир соҳадаги корруцион ҳолатлар ҳақида гапириб ўтган. Унга кўра, 2022 йил Наманганда тиббиёт соҳасида 27 та жиноят ҳолати аниқланган. Жиноятларнинг аcосий қисми ишга жойлаштириш учун пул олиш билан боғлиқ бўлган.

Жумладан, Поп туман тиббиёт бирлашмаси болалар бўлими ҳамшираси икки нафар фуқарони ишга жойлашни ваъда қилиб, ҳар биридан 500 доллардан, шу бирлашма ходимлар бўлими инспектори эса 350 доллардан олаётганда қўлга тушган.

Учрашув давомида Иноятов тиббиёт соҳасини коррупциядан холи қилишга ҳаракатлар бошланганини ҳам таъкидлаган.

“Очиқ-ойдин гапириш учун вазир ёки раҳбар ўзи тоза бўлиши керак. Агар ўзи тоза бўлса, мана бунақанги аудиторияда очиқ-ойдин гапиради. Сиз хулоса қилмасангиз, давлат дарров хулоса қилади”, – деган вазир масъуллардан бирига қарата.