Столтенберг: Украина НАТОга аъзо бўлади

Украина учун ҳозир имкониятлар ойнаси очилди ва кучлар мувозанатини ўз фойдасига ўзгартириш имконияти пайдо бўлди, деди НАТО бош котиби. Альянс аъзолари Киевга кўпроқ оғир қуроллар етказиб беришга ваъда қилишди.

Йенс Столтенберг / Фото: AFP

Украина Шимолий Атлантика альянсига аъзо бўлади, бироқ энди унинг асосий вазифаси ўз суверенитетини сақлаб қолиш учун Россия билан урушда ғалаба қозонишдир, деди НАТО бош котиби Йенс Столтенберг 15 февраль, чоршанба куни Брюсселда альянс мамлакатлари мудофаа вазирларининг учрашувлардан сўнг матбуот анжуманида. НАТОнинг эшиклари очиқ, дея таъкидлади у янги аъзолар Черногория ва Шимолий Македонияни, шунингдек, НАТОга аъзо бўлиш арафасида турган Швеция ва Финландияни мисол қилиб келтириб.

Бундан ташқари, НАТО Украинанинг киришини яқинлаштириши керак бўлган совет стандартлари ва тизимларидан иттифоқ стандартларига ўтиш учун Киев билан узоқ муддатли ҳамкорликка содиқдир. Бу жараёнда Украинанинг жанг майдонидаги муваффақияти муҳим омил ҳисобланади, деди Столтенберг.

14 февраль куни Украина мудофаа вазири Олексий Резников билан суҳбатдан сўнг НАТО аъзолари Киевни янада оғир қуроллар билан таъминлаш ва украиналик аскарларни тайёрлаш дастурларини кенгайтириш мажбуриятини олди, деди НАТО бош котиби. Унинг қўшимча қилишича, Украинада ҳозир бу урушда кучлар мувозанатини ўз фойдасига ўзгартириш имконияти бор.

Столтенберг иттифоқчиларга Украинани озиқ-овқат, ёнилғи, тиббий буюмлар, учувчисиз учиш аппаратлари ва сузувчи кўприклар билан таъминлайдиган НАТО ёрдам пакетига қўшган катта ҳиссаси учун миннатдорчилик билдирди.

Альянс аллақачон Украинага мисли кўрилмаган ёрдам кўрсатди, аммо энди унинг олдида нафақат украиналикларга қурол тизимларини етказиб беришни давом эттириш, балки камайиб бораётган стратегик қурол захираларини тўлдириш вазифаси турибди. Столтенбергнинг сўзларига кўра, Германия, АҚШ, Франция, Норвегия ва НАТОнинг бошқа аъзолари аллақачон мудофаа саноати корхоналари билан ўқ-дорилар ишлаб чиқаришни кўпайтириш бўйича келишувларга эришган.

Қурол назорати бўйича альянс Киев билан яқин мулоқотда, дея ишонтирди бош котиб.

Альянс аъзолари, шунингдек, Россия агрессияси таҳдидига дучор бўлган давлатлар – Молдова, Грузия ҳамда Босния ва Ҳерцеговинанинг мудофаа қобилиятини мустаҳкамлаш ва НАТО билан ҳамкорликни қўллаб-қувватлашни кучайтиради.