Жаҳон | 13:12 / 23.03.2023
4842
4 дақиқада ўқилади

Бербок: Германия Гуржистоннинг Европа истиқболини қўллаб-қувватлайди

Германия Ташқи ишлар вазирлиги раҳбари Шимолий Македония ва Гуржистонга ташриф буюряпти. Сафардан олдин у демократик стандартлар, оммавий ахборот воситалари ва оммавий мунозаралар эркинлигини ҳурмат қилиш зарурлигини айтди. 

Фото: Reuters

Германия Гуржистоннинг Европа истиқболини қўллаб-қувватлайди, деб маълум қилди Германия ташқи ишлар вазири Анналена Бербок. Шимолий Македония ва Гуржистонга ташриф билан борар экан, у ўз сафари давомида Берлин Европа интеграцияси тарафдори ва Москва билан яқинлашишга қарши бўлган гуржи халқи томонида эканлигини қатъий намойиш қилмоқчи эканлигини таъкидлади, деб хабар беради DW мухбири пайшанба, 23 март куни. 

Бербок таъкидлаганидек, гуржиларнинг аниқ мақсади - Европа Иттифоқига қўшилиш. «Сўнгги ҳафталарда улар Тбилиси кўчаларида Европа Иттифоқи байроғини ҳилпиратиб, плюрализм кўрсатишди ва қонун устуворлигини ҳимоя қилишди», деди у. Германия вазири мамлакатни фуқароларнинг аксарияти тарафдори бўлган европапараст йўлдан чалғитиш, Гуржистоннинг ўзида ҳам, ташқаридан ҳам босим ўтказишга қаратилган уринишларга ишора қилди. 

«Мен Тбилисида ҳукумат билан мамлакат Европа Иттифоқига номзод бўлиш учун ҳали қандай қадамлар қўйиши кераклиги ҳақида гаплашаман. Демократик стандартларни қўллаб-қувватлашдан ташқари, бу, айниқса, оммавий ахборот воситалари эркинлиги, фаол фуқаролик жамияти ва жамоатчилик муҳокамаси ҳақида бўлади - ҳатто баъзан турли нуқтайи назарларга эга бўлса ҳам», деди Бербок. Унинг таъкидлашича, ушбу қадриятлар Европа Иттифоқини бирлаштиради ва «бу ерда ҳеч қандай ўзгаришлар бўлиши мумкин эмас». 

Бундан ташқари, Германия ташқи ишлар вазири Шимолий Македониянинг Ғарбий Болқондаги бошқа ҳамкорлари каби Европа Иттифоқидаги ўрнини ҳам эълон қилди. «ЕИ кенгайиш жараёнининг барча иштирокчилари нима хавф остида эканлигини билишади: Европа оиласида келажак, барқарор фаровонлик ва тинчликка эга минтақа, ўз тақдирини ўзи белгилаш», — деди у. 

Март ойи бошида Гуржистонда парламент томонидан биринчи ўқишда қабул қилинган «хорижий таъсир» ва «чет эл агентлари» тўғрисидаги қонун лойиҳаларига қарши оммавий норозилик намойишлари бўлиб ўтди. Брюссел ушбу қонунчилик ташаббусини қаттиқ танқид қилди ва натижада ҳукмрон партия шов-шувли қонун лойиҳаларини қайтариб олишини эълон қилди. Гуржиларнинг қарийб 80 фоизи мамлакатнинг Европа Иттифоқига киришини қўллаб-қувватлайди. Бу мақсад Гуржистон конституциясида ёзилган. 

Гуржистон Украина ва Молдова билан бирга Европа Иттифоқига аъзо бўлиш учун ариза топширган. 2022 йил июнь ойида номзодлик мақоми Украина ва Молдовага берилди, бироқ Гуржистонга тақдим этилмади – унга «Европа истиқболи» мақоми таклиф қилинди. «Биз устуворликлар (Европа комиссияси таклиф қилган шартлар) амалга ошиши биланоқ Гуржистонга номзод мақомини беришга тайёрмиз», — деди ЕИ кенгаши раҳбари Шарл Мишел. Европа комиссияси унинг Европа интеграцияси йўлида олға силжиши учун 12 мезондан иборат рўйхатни илгари сурди.  

Ҳозирда Европа Иттифоқига аъзоликка расмий номзодлар Украина, Молдова, Албания, Шимолий Македония, Сербия, Черногория ва Туркиядир. Бироқ, бу мамлакатларнинг ҳеч бири учун Европа Иттифоқига кириш муддати аниқлаштирилмаган. 

Мавзуга оид