Тошкент вилоят суди раисининг ўринбосари қонунни бузгани учун лавозимидан четлаштирилди

Унинг ўрнига Олий суднинг Фуқаролик ишлари бўйича судлов ҳайъати судяси Азамат Икромов тайинланган.

Фото: Getty Images

Президент Шавкат Мирзиёевнинг 28 мартдаги фармойиши билан Анвар Шукуруллаев Тошкент вилоят суди раиси ўринбосари – иқтисодий ишлар бўйича судлов ҳайъати раиси лавозимидан озод этилди. Унинг четлатилиши одил судловни амалга ошириш чоғида қонунийликни бузгани билан изоҳланган.

Анвар Шукуруллаев 2021 йилнинг 1 мартида Тошкент вилоят суди раисининг ўринбосари этиб тайинланган эди. Бунгача эса у Олий суд судьяси бўлган.

Тошкент вилоят суди раисининг ўринбосари – иқтисодий ишлар бўйича судлов ҳайъати раиси лавозимига Азамат Икромов тайинланди. Тайинловгача Икромов Олий суднинг Фуқаролик ишлари бўйича судлов ҳайъати судяси, ундан аввал эса фуқаролик ишлари бўйича Бухоро вилоят суди раиси лавозимларида ишлаган.

Президент фармойиши билан Мақсудбек Саидов ўз аризасига кўра Тошкент шаҳар суди раисининг ўринбосари – иқтисодий ишлар бўйича судлов ҳайъати раиси лавозимидан бўшатилган. Унинг ўрнига Олий судининг судьяси вазифасида ишлаб келган Ибрагим Алимов тайинланган.