Зеленский Путинга «қолган кунларини ертўлада ўтказишни ва ҳожатхона ўрнига челак ишлатиш»ни тилади

Украина президенти Володимир Зеленский Россия президенти Владимир Путинга «қолган кунларини ертўлада ўтказишни, ҳожатхона ўрнига челак ишлатишни» тилади. 

УНИАН хабарига кўра, бу ҳақда Зеленский Черниҳив областининг Ягидне қишлоғига ташрифи чоғида, рус босқинчилари 2022 йил 3 мартдан 30 мартгача 367 нафар тинч аҳолини антисанитария шароитида сақлаган мактаб ертўласида айтди. 

«Буларнинг барчасини кўриб, мен Россия президентига қолган кунларини ертўлада ўтказишни ва ҳожатхона ўрнига челак ишлатишни тилайман», деди Зеленский. 

Украина раҳбари армиянинг қарши ҳужуми ҳақида ҳам фикр билдирди.

«Рус аскарларида чиқиб кетишга вақти бор, акс ҳолда уларни йўқ қиламиз», деди у.

Рус ҳарбийлари Ягидне қишлоғидаги мактаб ертўласида 2022 йил 3 мартдан 30 мартгача 367 нафар тинч аҳолини антисанитария шароитида, сув ва овқатсиз сақлаган. Гаровга олинганлар орасида 50 нафар бола, жумладан бир неча гўдак ҳам бор эди. Уларнинг энг кичиги бир ярим ойлик эди. 11 киши ғайриинсоний шароитларга дош беролмай вафот этган. Ўн нафари рус босқинчилари томонидан отиб ташланган. 

Ҳарбий босқин натижасида Ягидне қишлоғидаги барча 173 та ҳовли зарарланган, улардан 16 таси вайрон бўлган. Бундан ташқари, коммунал мулк объектлари - маданият уйи ва врачлик пункти вайрон қилинган. Мактаб биносига катта зарар етган. 

Черниҳив области ҳарбий бошқармаси бошлиғи Вячеслав Чаус сўзларига кўра, ўтган йил давомида давлат ва вилоят бюджетидан маблағ ажратилиши, кўнгиллилар туфайли, Латвия ҳукумати томонидан қурилиш материаллари ва уйларни тиклаш учун маблағ ажратилган. 100 дан ортиқ уй таъмирланган.