Марказий сайлов комиссияси референдум учун бюллетен шаклини тасдиқлади

Марказий сайлов комиссиясининг 5 апрель куни бўлиб ўтган мажлисида янги таҳрирдаги Конституция тўғрисидаги қонун лойиҳаси бўйича ўтказиладиган референдум бюллетени шакли ва матни тасдиқлангани ҳақида хабар берилди.

Унда «Сиз «Ўзбекистон Республикасининг Конституцияси тўғрисида»ги Ўзбекистон Республикасининг Конституциявий қонунини қабул қиласизми?» деган савол бўлади. Саволга «Ҳа» ёки «Йўқ» деб жавоб бериш керак.

Шунингдек, кўриш имконияти чекланган сайловчилар учун брайл алифбосидаги трафаретлар тайёрланди, дейилади йиғилишда.

Референдумда қатор давлатларнинг марказий сайлов комиссиялари, МДҲ Парламентлараро ассамблеяси, ЕХҲТ Демократик институтлар ва инсон ҳуқуқлари бюроси ва бошқа ташкилотлардан кузатувчилар иштирок этиши кутилмоқда.

Референдум 30 апрель куни бўлиб ўтади. Муддатидан олдин овоз бериш 19-26 апрель кунларига белгиланган.

Референдумни ўтказиш учун давлат бюджетидан 182 миллиард 380 миллион сўм ажратилган.