“Tutukon Neo” препаратининг айрим сериялари нега сотувдан олинганига изоҳ берилди

Соғлиқни сақлаш вазирлиги ҳузуридаги Дори воситалари, тиббий буюмлар ва тиббий техника экспертизаси ва стандартлаштириш давлат маркази “Tutukon Neo” препаратининг Ўзбекистонда сотилишини тақиқлаганди. Бунинг сабабини марказ мутахассиси Сабоҳат Ҳайитова очиқлади. Унга кўра, дорининг ножўя таъсири Ўзбекистонда ҳам бошқа давлатларда ҳам аниқланмаган, муаммо уни ишлаб чиқариш жараёни билан боғлиқ бўлган.

"Ижтимоий тармоқларда бу препаратни фармацевтика бозоридан қайтариб олиш жараёнлари нотўғри талқин қилинмоқда. Чунки бу препарат диорик таъсирга эга бўлган ўсимликлардан олинган доривор препарат. Бунинг ножўя таъсирлари жуда ҳам кам учраган. Лекин ҳали бизга келиб тушмади", – деди мутахассис.

Маълум бўлишича, “Tutukon Neo” дори воситасини ишлаб чиқарувчи Испаниянинг “Laboratorio Miquel” компанияси нафақат Ўзбекистонда, балки бошқа давлатларда ҳам айнан шу серияда тарқатилган ушбу турдаги дори воситаларининг сотувини тўхтатган ва уларни қайтаришни сўраган.

Мутахассиснинг айтишича, ишлаб чиқариш жараёнида йўл қўйилган камчиликлар кузатилгани сабабли бу дорини рўйхатдан ўтказган давлатлар дорининг 19та (R-049, R-050, R-051, R-078, R-080, R-222, R-236, R-081, R-124, R-204, R-205, R-206, R-218, R-219, R-220, R-221, R-223, R-224, R-225) сериясини барча фармбозоридан қайтариб олиш бўйича хат олган.

"Испаниядаги ҳамкасблар билан боғланганимизда, хатолик фақат ишлаб чиқариш жараёнида бўлганлигини маълум қилишди. Ножўя таъсирлари Испанияда ҳам, Швейцария ва Ўзбекистонда ҳам кузатилмаган", – деди у.