“Ўзбекистоннинг Германиядаги кўргазмаси дебочаси” — Саида Мирзиёева миллий оркестрнинг Берлиндаги концерти ҳақида

Ўзбекистон миллий симфоник оркестри Берлин филармониясининг катта залида концерт берди. Унда композитор Кирилл Рихтер ўзбек шеъриятига асосланган асарини тақдим этди. Концертда иштирок этган Саида Мирзиёева бу тадбир Берлиндаги Ўзбекистон кўргазмасининг очилишига дебоча бўлганини қайд этди.

Фото: Саида Мирзиёева

Ўзбекистоннинг археологик ёдгорликлари 4 май куни Берлинда намойиш қилинади. “Александр Македонскийдан Кушонлар империясигача” номли кўргазма 2024 йил январига қадар давом этади.

Намойишдан олдин Берлин филармониясининг катта залида Кирилл Рихтер ва Алибек Кабдурахмонов бошчилигидаги Ўзбекистон Миллий симфоник оркестрининг концерти бўлиб ўтди.

Унда Президент администрацияси шуъба мудири Саида Мирзиёева ҳам иштирок этиб, ўз фикрлари билан ўртоқлашди.

“Кирилл Рихтер айнан шу концерт учун ўзбек шеъриятига асосланган ноёб асар тайёрлаб, унинг мусиқаси ва сценографиясига муаллифлик қилди. Ушбу лойиҳа тингловчиларга ўзбек шеъриятининг теранлиги ва гўзаллигини ҳис этиш ҳамда созандаларимизнинг истеъдоди ва маҳоратига баҳо бериш имконини беради.

Ушбу мусиқий тадбирни “Ўзбекистоннинг археологик хазиналари. Александр Македонскийдан Кушонлар империясигача” кўргазмасининг дебочаси дейиш мумкин. Кўргазма юртимиз тарихининг бойлиги ва ранг-баранглигини намойиш этади ҳамда тарихий меросни асраш ва ўрганишнинг муҳим аҳамиятини кўрсатади”, – деди Саида Мирзиёева.