Павлоградга йўлланган зарба оқибатлари ва Авдийивка атрофидаги жангчилар. Уруш суратлари

Украинада урушнинг 432-куни ўтди. Асосий маълумотлар:

• 1 майга ўтар кечаси Россия қўшини Украина ҳудудлари бўйлаб 18 та ракета учирди. Бу ҳақда Украина ҚК бош қўмондони Валерий Залужний хабар берган. Днипропетровск областида тинч аҳоли вакилларидан икки киши ҳалок бўлиб, 40 киши яраланган.
• Брянск областида темирйўлда портлаш содир бўлиши оқибатида нефт маҳсулотлари ва ёғоч ортилган юк поезди релсдан чиқиб кетди. Жабрланганлар йўқ, регион расмийлари «Қўлга олиш» режаси ҳақида эълон қилган. Анархиячи телеграм-каналлар бу ҳодисани «релс партизанларининг улкан муваффақияти» деб атаган.
• Ленинград областида номаълум шахслар электр узатиш линияси устунини портлатиб юборишди, бу линия АЭС фаолиятини таъминлаган ва областнинг ярим миллион аҳоли яшовчи тўрт районига электр етказиб берган. ФХХ ва ИИВ қўпорувчилик ва портловчи қурилмаларнинг ноқонуний савдоси бўйича (РФ ЖК 281 ва 222.1 моддалари) жиноий иш қўзғатди.
• Петербург, Екатеринбург, Қозон ва Россиянинг бошқа шаҳарларида урушга қарши акциялар бўлиб ўтди. Новосибирскдаги митингга 50 нафарга яқин киши чиққан. Полициячилар бутун Россия бўйлаб камида беш нафар намойишчини қўлга олган. Қўлга олинганлардан бирига нисбатан Россия армиясини «такроран обрўсизлантириш» бўйича протокол тузилган.

Павлоградга зарба оқибатлари

1 майга ўтар кечаси Россия қўшини Павлоград шаҳрига зарба берди — Днипропетровск области таркибига кирувчи бу шаҳар Днипро шаҳридан тахминан 70 километр шарқда жойлашган. Президент Володимир Зеленский навбатдаги видеомурожаатида хабар беришича, бу ҳужум оқибатида икки йигит ҳалок бўлиб, тинч аҳоли вакилларидан яна қирқ киши яраланган. Украина ФВДХ маълумотига кўра, юздан ортиқ кўп квартирали ва хусусий уйлар, тўққизта ўқув биноси ҳамда бешта дўкон шикастланган.

Бундан ташқари, снарядлардан бири кимёвий заводга келиб тушган, бу ерда муддати ўтган ракета ёнилғиси сақланган. GeoConfirmed OSINT-лойиҳаси экспертлари зарбадан кейинги портлаш Днипропетровск ва қўшни тўрт областда экологик ҳалокат келтириб чиқариши мумкинлигини айтганди. Аммо Павлоград ҳукумати тасдиқлашича, шаҳарда кимёвий хавф йўқ.

РФ мудофаа вазирлиги 1 майга ўтар кечаси Россия қўшини «Украинанинг ҳарбий-саноат комплекси  объектларига» зарбалар бериб, «Украина қўшинлари учун ўқ-дори, қуроллар ва ҳарбий техникалар ишлаб чиқарувчи корхона фаолияти тўхтатилгани» ҳақида маълум қилган.

Авдийивка атрофидаги украин ҳарбийлари

Авдийивка — Россия томонидан аннексия қилинган Донецк шаҳридан шимолда жойлашган бўлиб, 2014 йилдан буён фронт чизиғи шаҳар чеккасидан ўтади. Авдийивка Украина ҚК назоратида қолмоқда, шаҳар мунтазам равишда Россия қўшинлари томонидан ўққа тутилади. Шу туфайли махсус техникали қутқарувчилар харобаларни тозалаш учун Авдийивкага кела олмайди: шаҳар ҳарбий маъмурияти раҳбари Виталий Барабашга кўра, 28 апрел куни беш қаватли уй харобалари остида 81 ёшли аёл, 30 апрел куни эса — 61 ёшли эркак қолиб кетган. Ҳозирга қадар уларни қутқаришнинг имкони бўлмаган. «Афсуски, биринчи ҳолатда ҳам, иккинчисида ҳам ҳаёт нишоналари кўринмаяпти», — деган Барабаш. Россия томони Авдийивкага 28 ва 30 апрел кунлари йўлланган зарбалар юзасидан изоҳ бермаган.

Қуйида Украина қуролли кучларининг шаҳар атрофидаги позициялари акс этган суратлар.

Фронтнинг турли нуқталаридан суратлар

Ленинград областида электр узатиш линияси портлатилиши