Францияда Саркозини «Ливия пуллари» иши бўйича суд қилиш талаб этилди 

Франция молия прокуратураси (ФМП) собиқ президент Николя Саркози ва унинг 2007 йилдаги президентлик кампаниясини Ливия томонидан молиялаштирилгани бўйича шов-шувли ишда гумонланаётган ўн икки кишига нисбатан суд маҳкамаси ўтказишни талаб қилди. 

Прокуратура Саркози ва бу ишда гумонланаётган бошқа 12 киши, хусусан, собиқ ички ишлар вазири Клод Жан, Франциянинг бюджет бўйича собиқ вазири Эрик Верт, Саркозининг энг яқин ёрдамчиларидан бири Брис Ортефени жавобгарликка тортишни талаб қилувчи 425 саҳифалик айблов хулосасини эълон қилди. 

Прокуратура Франциянинг собиқ президентини «пассив коррупция», жиноий ҳамжамиятда иштирок этиш, сайлов кампаниясини ноқонуний молиялаштириш ва давлат маблағларини талон-торож қилишда айбламоқда. 

Николя Саркози бу айбловларни рад қилиб келяпти. 

Аввалроқ Франция матбуоти Саркози ўз сайлов кампанияси учун Ливия раҳбари Муаммар Қаззофийдан ўн миллионлаб евро олгани, Франция президенти этиб сайланганидан кейин эса уни ағдариш операциясини қўллаб-қувватлагани ҳақида хабар берган эди. 2012 йилдан 2023 йилгача бўлган тўққиз йиллик тергов давомида Саркози кампаниясини ноқонуний молиялаштириш аломатлари расман тасдиқланмади. 

Эҳтимолий келишувнинг воситачиси француз-ливанлик тадбиркор Зиёд Тақийиддин бўлиб, у Ливия раҳбари Саркозига нафақат сайлов кампанияси, балки бошқа мақсадлар учун ҳам пул берганини даъво қилди. Шунингдек, жомадонга солинган пулларни шахсан етказганини айтди. Кейинроқ, Тақийиддин кутилмаганда ўз сўзларидан тонди. 

2018 йилда прокуратура Тақийиддин 2006 йилда Ливия раҳбари вакилларидан Саркозининг сайлов кампанияси учун 50 миллион евро олгани ҳақидаги версияни илгари сурди. Саркози ўзига қўйилган айбловларни туҳмат деб атамоқда.