Ўзбекистон ва Хитой ТИВ раҳбарлари ҳамкорлик дастурини имзолади

Президент Шавкат Мирзиёевнинг Хитойга давлат ташрифи доирасида Ўзбекистон ва ХХР ташқи ишлар вазирлари Бахтиёр  Саидов ва Цин Ган Сиан шаҳрида икки мамлакат ташқи сиёсат идоралари ўртасида 2023-2024 йилларга мўлжалланган ҳамкорлик дастурини имзолади.

«Ўзбекистон ва Хитой ташқи ишлар вазирликлари ўртасида 2023-2024 йилларга мўлжалланган ҳамкорлик дастурини имзоладик», - деб ёзди Ўзбекистон ТИВ раҳбари ўзининг Telegram-каналида. 

Қайд этилишича, икки давлат ташқи сиёсат идоралари барча соҳаларда стратегик шерикликни янада мустаҳкамлаш, шунингдек, мамлакатлар ўртасидаги фаол ва жадал алмашинувларни рағбатлантириш тарафдоридир.

Бундан олдин Хитой ўзбекистонликларнинг мамлакатга кириш тартибини соддалаштирмоқчи экани хабар қилинганди. Бу ҳақда Ўзбекистон ва Хитой раҳбарларининг учрашуви якунлари бўйича қўшма баёнотда айтилган.

«Томонлар 2019 йилда Хитой Халқ Республикаси ҳукумати ва Ўзбекистон Республикаси ҳукумати ўртасида ишбилармон доиралар вакиллари учун виза тартибини соддалаштириш тўғрисида имзоланган битим икки томонлама муносабатларни мустаҳкамлаш, иқтисодий, савдо ва сармоявий ҳамкорлик учун кенг истиқболларни очиб берганини таъкидладилар. 

ХХР Хитой фуқаролари учун Ўзбекистонга 10 кунлик визасиз кириш режими бўйича сиёсатни юқори баҳолайди ва Ўзбекистон фуқароларининг Хитойга киришини осонлаштириш чораларини кўришга тайёр», — дейилади ҳужжатда.