2022 йил 29 сентябр куни Шаҳрихон туманига қарашли 1-сон туғуруқхонада 25 ёшли аёл вафот этган. Аёлнинг оила аъзолари иш 8 ойдан бери кўриб чиқилмаётганидан норози эканини айтиб, Kun.uz'га мурожаат қилди. Марҳуманинг онаси Ҳайитхон Солиеванинг айтишича, қизини 25 сентябр куни туғуруқхонага олиб келишади. Аёл кесарча кесиш йўли билан фарзандини дунёга келтиради. Онасининг сўзларига қараганда, қизи амалиётдан яхши чиққан.
«Амалиёт яхши ўтди. Операциядан чиққанидан кейин қизим билан кўришганимда аҳволи жуда яхшилигини айтди. Операциядан кейин бир неча соат ўтиб ҳам аҳволи яхши эди. Кейин бирдан қон кетяпти дейишди», – дейди аёл.
Шундан кейин шифокорлар аёлга қон қуйиш ҳаракатига тушишган. Солиеванинг айтишича, марҳуманинг отаси қизига қон бермоқчи бўлган. Лекин вирус бор деб, отасининг қонини қуйишмаган.
«Унинг ўрнига рўйхатда турган, қон гуруҳи тўғри келадиган қизни айтишди. Бориб олиб келдик. Ўшанинг қонини қуйишди.
Янгидан қон топширганда отасининг қон таҳлили яхши чиқди. Лекин 2 йилча олдин вирус чиққан экан. Ўша тақиқ олиб ташланмагани учун рухсат беришмади», – дейди марҳуманинг онаси.
Ҳайитхон Солиева қизига қон қуйиш жараёнида шифокорлар эътиборли бўлмаганидан норозилигини ҳам билдирди.
«Залда ўтирганимда боламнинг бақирган овози эшитилди. Югуриб олдига кирсам, ёнида ҳеч ким йўқ экан. Қон уланган, болам ўтириб олиб, бир нуқтага термилиб бақираётганди. Мен врачларни чақирдим», – дейди у.
Солиеванинг айтишича, беморга дарҳол кислород улашган, аёл шу ҳолатда 6 кун ётган. Ва олтинчи кун вафот этган. Марҳуманинг отаси Баҳодир Солиевнинг сўзларига кўра, жасад экспертиза қилинган, Андижон туман прокуратураси жасадни текшириб кўриб, «нотўғри қон қуйилиши натижасида ўпка ғижимланиб қолган» деган хулоса берган.
«Экспертиза хулосаси чиққанидан кейин ҳам туман прокуратурасига бир неча марта бориб келдим. 8 ойдан бери натижасини кутяпмиз. Тиббий маълумотнома келмаяпти деб мени қайтариб юборишяпти», – дейди марҳуманинг отаси.
Ҳолат бўйича тўлиқ маълумот олиш учун Kun.uz Шаҳрихон туман прокуратураси билан боғланди. Маълум бўлишича, аёлга камқонлик ташхиси қўйилган ва 2022 йилнинг 29 октябрида жиноят иши қўзғатиш рад қилинган.
