Фарғона шаҳридаги 10-мактабнинг 11-синф ўқувчиси Дилафруз Жўрабоева Microsoft компаниясининг ёшларга мўлжалланган Microsoft Learn Student дастури Ўзбекистондаги илк аёл амбассадори бўлди. Эндиликда у Microsoft компаниясининг Ўзбекистондаги юзи сифатида фаолият олиб боради.
Kun.uz мухбири 16 ёшида Microsoft’нинг расмий элчиси унвонига сазовор бўлган қиз билан муваффақият йўли, орзулари ва келажак режалари ҳақида суҳбатлашди.
Қишлоқдан шаҳарга кўчиб келган қиз
“Асли Бувайда туманиданман. Болалигимда биринчи синфни яхши баҳоларга тамомлай олмаганим учун оилавий Фарғона шаҳрига кўчиб келишга мажбур бўлганмиз.
Бир муддат ўзимни журналист сифатида ҳам кўрдим. Вақтлар ўтиб Фарғона шаҳрига ҳам замонавий касблар кириб кела бошлади. “Нажот таълим” марказидаги SMM курсига рўйхатга ёзилдим. Икки кундан кейин марказдан дастурлаш курсига таклиф қилишди. Бошида бу касбни эплай олмасам керак деб қўрққанман. Чунки SMM’да кўпроқ ўғил болалар муваффақиятга эришади деб ўйлар эдим.
Спорт соҳасидаги дастурчилик ишларида ҳам ўзимни синаб кўрдим. Лекин дастурлашда ҳам ўз йўналишим бўлиши керак деган қарорга келдим ва Backend (вебсайт ва мобил иловаларнинг ички қисми) соҳасига кирдим.
Соҳада кўпроқ билим орттириш учун 15 ёшимда Тошкент шаҳрига кўчиб кетишга мажбур бўлганман. Албатта, бу ёшда катта шаҳарда яшаш мен учун осон бўлмади. Устозим қизиқишларимни кўриб Microsoft’даги тадбирларга жалб қила бошлади. Microsoft бир қисми бўлишим ҳақида эса умуман ўйламаган эдим.
Microsoft MLSA лойиҳасида қатнашган Ўзбекистондаги ягона мактаб ўқувчиси
Ўзбекистонда биринчи марта “Microsoft Developers Community Uzbekistan” жамоасига асос солдик. Шу жамоа билан бирга катта тадбир ташкил этдик ва унда минглаб одамларга кўнгилли сифатида ёрдам бердим. Microsoft’да ишлашни астойдил хоҳлаганман. 16 ёшга тўлганимда Microsoft амбассадори сифатида фаолият юритишни бошладим. Кейинчалик устозим билан Microsoft доирасидаги махсус дастурга тайёргарлик кўра бошладик.
